सोलापूरच्या दुष्काळाचा कलंक पुसून काढणार ; भाजपच्या दोन्ही उमेदवारांचा पंढरपुरात संकल्प ; काय आहे दोघांकडे मास्टर प्लॅन
पंढरपूर : खासदार म्हणून दिल्लीत गेल्यावर केंद्र आणि राज्यशासनाच्या मदतीने उजनी धरणातील गाळ काढण्याचे काम हाती घेवून जिल्हयाच्या कानाकोपर्‍या पर्यंत उजनीचे मुबलक पाणी पोहोचविणे तसेच स्थानिक तरुणांना सोलापूरातच काम निर्माण करण्याच्या दृष्टीने आपण प्रयत्न करणार असून सोलापूर व माढा या दोन्ही मतदारसंघातून आम्हा भाजपाच्या दोन्ही उमेदवाराना मोठया मताधिक्याने विजयी करण्याचे आवाहन आमदार राम सातपुते यांनी पंढरपूरात झालेल्या शिवसेनेच्या मेळाव्यात केले.
शिवसेनेचे संंपर्क प्रमुख प्रा.शिवाजी सावंत यांच्या पुढाकाराने माढा व सोलापूर मतदारसंघातील शिवसैनिकांचा मेळावा आयोजित करण्यात आला होता. अध्यक्षस्थानी आ.शहाजी पाटील होते. या प्रसंगी माढा लोकसभेचे उमदेवार खा.रणजितसिंह नाईक निंबाळनर, प्रा.शिवाजी सावंत, भाजपा जिल्हाध्यक्ष चेतनसिंह केदार, शिवसेनेचे जिल्हाप्रमुख महावीर देशमुख, जिल्हाप्रमुख अमोल शिंदे, प्रा.बी.पी.रोंगे, शिवसेनेचे जिल्हयातील पदाधिकारी व शिवसैनिक मोठया संख्येने उपस्थित होते.
उपस्थित शिवसैनिकांनी माढयातून खा.रणजितसिंह निंबाळकर व सोलापूरातून आ.राम सातपुते यांना मोठे मताधिक्य मिळवून देण्याचे आश्वासन या प्रसंगी दिले.
आ.राम सातपुते पुढे बोलताना म्हणाले, मी ऊस तोड कामगाराचा मुलगा असून दुष्काळ काय असतो ते मी अनुभवले आहे. सोलापूर जिल्हयाला लागलेला दुष्काळाचा कलंक पुसून टाकण्यासाठी मी स्वत: खा.रणजितसिंह निंबाळकर, आ.शहाजी पाटील यांनी अथक प्रयत्न केले आहेत. दुष्काळी सांगोला तालुक्याला पाणी मिळाले म्हणून खा.निंबाळकर यांची सांगोल्यात हत्ती वरुन मिरवणूक काढली होती. सोलापूर, पंढरपूर शहराला जोडणारे सर्व रस्ते चकचकीत झाले असून आमच्या माय माऊलींच्या डोक्यावर असलेला पाण्याचा हंडा उतरविण्यासाठी एक हजार पेक्षा जास्त ग्रामपंचायती मध्ये जलजीवन मिशनद्वारे पिण्याचे शुध्द पाणी मिळालेले आहे. घरातील चुल काढण्यासाठी सोलापूर जिल्हयातील दोन लाख घरात उज्वला योजनेअंतर्गत गॅस जोडण्या दिल्या आहेत. ही निवडणुक सोलापूर जिल्ह्याचे व देशाचे भवितव्य ठरविणारी असल्याने मोदी यांना पुन्हा पंतप्रधान करण्यासाठी सोबत रहा असे आवाहन केले.
प्रा.शिवाजी सावंत म्हणाले, शिवसेना व भाजपाच्या कार्यकत्यांनी एकत्रितपणे हातात हात घालून काम करणे गरजेचे असून भाजपाचे दोन्ही उमेदवार मोठया मताधिक्याने विजयी होणार याबाबत मला कोणतीही शंका नाही परंतु, निवडून आल्यावर त्यांनी भाजपा कार्यकर्त्यांप्रमाणे शिवसैनिकांना जवळ घेवून त्यांचीही कामे करावीत अशी अपेक्षाही त्यांनी याप्रसंगी व्यक्त केली.
शरद पवारां मुळे पंढरपूर बारामती रेल्वे मार्ग रखडला : खा.रणजितसिहं निंबाळकर
माढा मतदारसंघातून निवडून गेलेल्या शरद पवारांनी या भागातील जनतेला फसवण्याचे काम केले, उजनीचे पाणी बारामतीला पळवले मी व आ.शहाजी पाटील यांनी ते पाणी पुन्हा जिल्हयाला मिळवून दिले. बारामती पंढरपूर रेल्वे मार्गास ही पवारांनी विरोध केला. राज्यात महाविकास आघाडीचे सरकार असताना त्यांनी राज्य शासनाचा हिस्सा देण्यास विरोध केला त्यांमुळे या मार्गाचे काम रखडले.
