सोलापुरात भाजप वन-टू-वन टच मध्ये ; आमदार देवेंद्र कोठे यांच्या नेतृत्वाखाली जोरदार प्रचार
सोलापूर : पुणे पदवीधर मतदारसंघ व पुणे विभाग शिक्षक मतदारसंघ निवडणूकीसाठी सोलापूरची आढावा बैठक आमदार देवेंद्र कोठे यांच्या संपर्क कार्यालयात उत्साहात झाली. पदवीधर व शिक्षक मतदारसंघाच्या भाजपच्या दोन्ही उमेदवारांना सोलापुरातून मताधिक्य देण्यासाठी भाजपाचे पदाधिकारी आणि कार्यकर्त्यांनी मतदारांच्या भेटी आणि बैठकांचा धडका लावला आहे.
मुख्यमंत्री देवेंद्र फडणवीस यांनी नुकतीच पुणे येथे सर्व आमदारांची बैठक घेऊन पदवीधर व शिक्षक मतदारसंघाच्या निवडणुकीबाबत सूचना दिल्या होत्या. यानंतर प्रदेशाध्यक्ष रवींद्र चव्हाण आणि पालकमंत्री जयकुमार गोरे यांच्या सूचनेनुसार शहरातील भाजपा पदाधिकारी, नगरसेवक आणि कार्यकर्त्यांची बैठक झाली. यावेळी आमदार देवेंद्र कोठे, निवडणूकीचे पश्चिम महाराष्ट्र सहसंयोजक विक्रम देशमुख, महापौर विनायक कोंड्याल, शिखर बँकेचे माजी संचालक तथा शहर उपाध्यक्ष अविनाश महागावकर यांची प्रमुख उपस्थिती होती.
यावेळी निवडणुकीसाठी सोलापूर शहरातील मतदारांच्या भेटी घेऊन, त्यांना मतदानाची प्रक्रिया समजावून सांगण्यात बाबत सूचना देण्यात आल्या. ठराविक मतदारांमागे तसेच प्रभागाला नेमण्यात आलेल्या निरीक्षकांना देखील विविध सूचना देण्यात आल्या. पदवीधर आणि शिक्षक मतदारसंघाच्या दोन्ही उमेदवारांना सोलापुरातून मोठे मताधिक्य देण्याचा निर्धार यावेळी आमदार देवेंद्र कोठे यांनी व्यक्त केला.
या बैठकीत आगामी निवडणुकीच्या पार्श्वभूमीवर मतदारसंघातील संघटनात्मक तयारी, नियोजन, मतदार नोंदणी आणि निवडणुकीसंदर्भातील विविध बाबींवर सविस्तर चर्चा करण्यात आली. तसेच निवडणुकीच्या कामकाजाला गती देण्यासाठी आवश्यक नियोजन व समन्वयाबाबत आवश्यक सूचना देण्यात आल्या.
याप्रसंगी महापौर विनायक कोंड्याल, शिखर बँकेचे माजी संचालक तथा शहर उपाध्यक्ष अविनाश महागावकर, सरचिटणीस सुधा अल्लीमोरे, नगरसेवक अक्षय अंजिखाने, मंडल अध्यक्ष नागेश सरगम, नागेश खरात यांच्यासह भारतीय जनता पक्षाचे सर्व नगरसेवक, पदाधिकारी, शक्तिकेंद्रप्रमुख व कार्यकर्ते मोठ्या संख्येने उपस्थित होते.
