अभिनंदन ! अरुण क्षीरसागर यांची जिल्हा दक्षता व नियंत्रण समितीवर अशासकीय सदस्य म्हणून नियुक्ती
सोलापूर दि. कास्ट्राईब जिल्हा परिषद कर्मचारी संघटनेचे जिल्हाध्यक्ष, कर्मचारी चळवळीतील नेते अरुण क्षीरसागर यांची जिल्हा दक्षता व नियंत्रण समितीवर अशासकीय सदस्य म्हणून नियुक्ती केल्याचे पत्र जिल्हाधिकारी कार्तिकेयन तथा अध्यक्ष जिल्हा दक्षता व नियंत्रण समिती यांनी दिले असून, या निवडीबद्दल अरुण क्षीरसागर यांचे सर्व स्तरातून अभिनंदन होत आहे.
अरुण क्षीरसागर हे 2007 पासून कास्ट्राईब जिल्हा परिषद कर्मचारी संघटनेचे जिल्हाध्यक्ष म्हणून कार्यरत आहेत. संघटनेच्या माध्यमातून जिल्हा परिषदेतील मागासवर्गीय कर्मचाऱ्यांचे अनेक प्रश्न त्यांनी सोडवले आहेत. जिल्हा परिषदेमधील सेवा काळात त्यांना महाराष्ट्र शासनाचा गुणवंत कर्मचारी पुरस्कार आणि अनेक राज्यस्तरीय पुरस्काराने सन्मानित केले आहे. त्यांच्या सेवापूर्ती निमित्त त्यांच्या जीवनकार्याचा आढावा घेणारा संघर्ष योद्धा हा गौरवांक प्रसिद्ध झालेला असून, कास्ट्राइब संघटनेचे संस्थापक अध्यक्ष कृष्णा इंगळे यांनी सेवानिवृत्तीनंतरही त्यांच्या कार्यकर्तृत्वामुळे संघटनेचे जिल्हाध्यक्ष म्हणून पदावरती कायम ठेवले आहे. अरुण क्षीरसागर यांनी प्रयत्न करून कास्ट्राईब संघटनेसाठी जिल्हा परिषदेच्या आवारात कार्यालय निर्माण करून, आज ते सेवानिवृत्तीनंतरही पूर्णवेळ मागासवर्गीय कर्मचाऱ्यांचे प्रश्न सोडवण्यासाठी कार्यरत आहेत.
त्यांना कास्ट्राईब कर्मचारी महासंघ, महाराष्ट्र राज्य यांच्याकडून संघटनेच्या कामाबद्दल जीवन गौरव पुरस्काराने त्यांच्या सेवानिवृत्तीनंतर सन्मानित करण्यात आले आहे. या सर्व कार्याची दखल घेऊन, अरुण क्षीरसागर यांची जिल्हा दक्षता व नियंत्रण समितीवर निवड झाली असल्यामुळे, जिल्हा परिषद सर्व संवर्गीय अधिकारी कर्मचारी, मागासवर्गीय कर्मचारी यांना आनंद झाला असून,आंबेडकरी चळवळीतल्या जाणत्या, ज्येष्ठ नेत्याचा हा सन्मान आहे या भावनेने अरुण क्षीरसागर यांचे सर्वत्र अभिनंदन आणि कौतुक होत आहे.
जिल्हा अनुसूचित जाती जमाती दक्षता व नियंत्रण समितीवर अरुण क्षीरसागर यांची निवड झाल्याबद्दल सीईओ कुशल जैन, अतिरिक्त सीईओ संदीप कोहिणकर, उपमुख्य कार्यकारी अधिकारी स्मिता पाटील, शिक्षण सभापती केदार यांच्या हस्ते बुके देऊन सत्कार करण्यात आला.
