“हे एक दिवस होणारच होतं” ; प्रचंड लुबाडणूक सुरू होती, बरं झालं पडल्या हातात बेड्या
बांधकाम कामगार योजनेअंतर्गत भांड्यांचा संच देण्याकरिता पाचशे रुपयाची लाच घेणाऱ्या बांधकाम कामगार विभागातील दोन कर्मचाऱ्यांना पोलिसांनी ताब्यात घेतले आहे.
आरोपी खाजगी इसम विनोद विजय गाडेकर, वय ३७ वर्षे, पद ऑपरेटर भांडी वाटप केंद्र, उपळाई (बु.) रा. उपळाई (बु.) ता. माढा, जि. सोलापूर व दिनेश मनोहर वाघमारे, वय २३ वर्षे, पद ऑपरेटर भांडी वाटप केंद्र, उपळाई (बु.) रा. माळी वस्ती, उपळाई (बु.) ता. माढा, जि. सोलापूर या दोघांना लाचलुचपत प्रतिबंधक विभागाकडून अटक करण्यात आलंय.
यातील तक्रारदार हे बांधकाम कामगार असून, त्यांनी कामगारांकरीता शासनाकडून मोफत मिळणाऱ्या भांडीसंच साठी दि.२७/०३/२०२६ रोजी अर्ज केला होता. सदर बांधकाम कामगार कल्याणकारी मंडळाकडून बांधकाम कामगारांना मोफत देण्यात येणारे गृह उपयोगी भांडी संच देण्यासाठी तक्रारदार यांना प्रथम १२००/- रुपये व तडजोडीअंती ५००/- रुपये लाचेची मागणी यातील आरोपी क्र. १ हे करत असल्याची तक्रार दि.१६/०४/२०२६ रोजी तक्रारदार यांनी केली.
त्यानंतर तक्रारदार यांनी तक्रारदार दिल्यानंतर दि. १६/०४/२०२६ रोजी तक्रारीची पडताळणी दोन शासकीय पंचांच्या उपस्थितीत करण्यात आली. आरोपी क्र. १ गाडेकर यांनी महाराष्ट्र इमारत व इतर बांधकाम कामगार कल्याणकारी मंडळा मार्फत मोफत देण्यात येणारे भांडे संच देण्यासाठी ५००/- रुपये लाचेची मागणी केल्याचे निष्पन्न झाले.
आज दि.०६/०५/२०२६ रोजी महाराणी लक्ष्मीबाई विद्यालयातील कार्यालयामध्ये आरोपी क्र. १ गाडेकर यांनी आरोपी क्र. २ वाघमारे यांचे समक्ष तक्रारदार यांना लाचेची रक्कम आरोपी क्र. २ वाघमारे यांचेकडे देण्यास सांगितले व वाघमारे यांनी ५००/- रुपयाची लाच रक्कम पंचासमक्ष स्विकारली असता नमुद दोन्ही आरोपी यांना रंगेहात पकडून ताब्यात घेण्यात आले आहे. यांचेविरुद्ध माढा पोलीस ठाणे येथे गुन्हा दाखल करण्याची प्रक्रिया सुरु आहे.
बांधकाम कामगार योजनेअंतर्गत विविध योजना राबवल्या जातात त्यामध्ये भांड्यांचा संच सेफ्टी किट अत्यावश्यक वस्तूंचे साहित्य असे तीन वेगवेगळे संच मिळतात आणि हे संच घेण्यासाठी बांधकाम कामगारांना शहराच्या बाहेर एकच गोडाऊन मध्ये जावे लागते आणि त्या ठिकाणी संबंधित ऑपरेटर आणि कर्मचारी प्रत्येकी कामगारांकडून पाचशे रुपये घेतले शिवाय ते संच देत नाहीत अशी ओरड कायम ऐकण्यास मिळते. त्यामुळे झालेली कारवाई योग्य असून यापुढे असे पैशाची बेकायदेशीर मागणी होणार नाही याची काळजी बांधकाम कामगार विभागाने घ्यावी.
