राहुल गांधी यांची तोफ आज सोलापुरात ; काँग्रेसने केली सभेची जय्यत तयारी
सोलापूर लोकसभा निवडणूक काँग्रेस इंडिया आघाडीचे उमेदवार प्रणिती शिंदे यांचा प्रचाराचा झंझावात सुरू असून ‘सोलापूरची लेक’ म्हणून प्रचंड प्रतिसाद मिळत आहे. सोलापूर लोकसभा मतदारसंघासाठी 7 मे रोजी मतदान होणार आहे. या पार्श्वभूमीवर महाविकास आघाडीच्या उमेदवार प्रणिती शिंदे यांच्या प्रचारार्थ काँग्रेस नेते राहुल गांधी यांच्या जाहीर सभेचे आयोजन करण्यात आले आहे. ही सभा आज बुधवार 24 एप्रिल रोजी सोलापूर शहरातील मरीआई चौकातील एक्झिब्युशन ग्राउंड येथे दुपारी 3 वाजता होणार आहे.
या जाहीर सभेची काँग्रेस पक्षाकडून जय्यत तयारी करण्यात आली आहे. सोलापुरात ऊन असल्याने सभेला आलेल्या नागरिकांसाठी पाच हजार छत्र्या, दहा हजार पांढरे गमजे हे देण्यात येणार आहेत तसेच तीस हजार पाण्याच्या बाटल्याचे नियोजन करण्यात आल्याचे सांगण्यात आले. भारत जोडो यात्रेनंतर राहुल गांधी यांची क्रेज संपूर्ण देशात तयार झाली राहुल गांधी हे प्रथमच सोलापूरच्या दौऱ्यावर येत असल्याने त्याची उत्सुकता नागरिकांमध्ये आहे ते भाजपच्या सरकारवर काय बोलणार याकडेही सर्वांचे लक्ष लागले आहे.
