भाजप आमदार श्रीकांत भारतीय यांनी विनम्रपणे मागितली माफी ; का झाला होता त्यांना मराठा समाजातून विरोध
सोलापूर : भारतीय जनता पार्टीचे आमदार श्रीकांत भारतीय यांनी आपल्या श्वानाचे नाव शंभू असे ठेवले होते. त्याबद्दल त्यांनी तशी पोस्ट आपल्या फेसबुक अकाउंट वर टाकली होती. यानंतर मराठा समाजातून त्यांच्यावर टीकेची झोड उडाली आणि मराठा समाजाने तीव्र भावना व्यक्त केल्या. शेवटी मराठा समाजाच्या भावनांचा आदर करत श्रीकांत भारतीय यांनी विनम्रपणे आपल्या फेसबुक अकाउंट वर जाहीर माफी मागितली आहे.
नमस्कार ! काल गुढीपाडव्याच्या शुभमुहूर्तावर श्री गुरु दत्तात्रयाचे वाहन श्वानाचे घरी आगमन झाले. प्राणीतत्वामध्ये ईश्वर बघण्याची आपली संस्कृती आणि शिकवण !!!
‘शिव शंकर नमामी शंकर शिव शंकर शंभो’ यातूनच हे नाव ठेवावं असा विचार आला. आम्ही दत्तात्रयाचे उपासक !! श्वान हे त्यांचं वाहन !!! स्वाभाविकपणे घर धार्मिक !!! म्हणून हे नाव.
पण दुर्दैवाने याचा विपर्यास केला गेला. धर्मवीर छत्रपती संभाजी महाराज आमचा प्राण आहे. आम्ही 4 पिढ्या वारकरी आहोत. या जन्मात तर आहेच. पण जन्मोजन्मी धर्मवीर संभाजी महाराज हे आमचे दैवत राहील.
तथापि मी एक संवेदनशील राजकीय कार्यकर्ता आहे. गैरसमजातून सुद्धा कुणाच्या भावना दुखावल्या असतील तर मी खेद व्यक्त करतो. त्यांची क्षमा मागतो. पण या मागची माझी पवित्र भावना समजून घ्यावी, अशी विनंती करतो.
जय जिजाऊ, जय शिवराय!
