अजित पवारांचा दौरा यशस्वी करण्यासाठी जिल्ह्याची जोरदार तयारी ; जिल्हाध्यक्ष दिपक साळुंखे यांनी घेतली भरगच्च बैठक
सोलापूर : अजित पवार हे राज्याचे उपमुख्यमंत्री झाल्यानंतर प्रथमच सोलापूर दौऱ्यावर येत असून त्याची राष्ट्रवादी काँग्रेस पक्षाच्या वतीने जोरदार तयारी करण्यात येत आहे.
अजित पवारांच्या या दौऱ्यामध्ये जिल्हा राष्ट्रवादी काँग्रेस कार्यालयाचे उद्घाटन शहर राष्ट्रवादी काँग्रेस कार्यालयाचे उद्घाटन यासह सोलापूर जिल्हा पदाधिकारी कार्यकर्ते आणि शहराचा पदाधिकारी कार्यकर्त्यांचा मेळावा होणार आहे. तसेच सोलापूरच्या रामवाडी भागामध्ये गटनेते तथा जिल्हा नियोजन समितीचे विशेष निमंत्रित सदस्य किसन जाधव यांनीही महिलांसाठी साडी वाटपाचा मोठा कार्यक्रम घेतला आहे.
हेही वाचा : सोलापूर जिल्हा राष्ट्रवादीची जंबो कार्यकारिणी जाहीर
त्या अनुषंगाने जिल्हाध्यक्ष दीपक साळुंखे पाटील यांनी आपल्या नवीन जिल्ह्याच्या कार्यालयात जिल्ह्यातील प्रमुख पदाधिकारी सर्व तालुकाध्यक्ष महिला पदाधिकारी यांची बैठक घेतली.
या बैठकीला जिल्हा खजिनदार राजेंद्र हजारे, माळशिरसचे नेते उत्तम जानकर, पंढरपूरचे नेते कल्याणराव काळे, दक्षिणचे बाळासाहेब बंडगर, महिला आघाडीच्या लातूर निरीक्षक सुवर्णा झाडे, राष्ट्रवादीचे युवक आघाडी यांच्यासह सर्व तालुकाध्यक्ष मोठ्या संख्येने उपस्थित होते.
महायुती सरकार मधून राज्याचे उपमुख्यमंत्री झाल्यानंतर अजित पवार हे प्रथम सोलापूर दौऱ्यावर येत आहेत. त्यांचा दौरा यशस्वी करण्यासाठी प्रत्येक पदाधिकारी कार्यकर्त्यांनी कामाला लागावे, आपल्या प्रत्येक भागात अजितदादांचे बॅनर पोस्टर लावावेत, या मेळाव्याला आपल्या भागातून जास्तीत जास्त कार्यकर्ते उपस्थित राहण्यासाठी प्रत्येकाने प्रयत्न करावेत अशा सूचना जिल्हाध्यक्ष दीपक साळुंखे यांनी केल्या. आगामी लोकसभा आणि विधानसभा निवडणुकीसाठी आपली संघटनात्मक बांधणी करून सोलापूर जिल्ह्यात अजित पवारांची ताकद सिद्ध करावी असे आवाहन उपस्थिताना केले.
