त्यावेळी होते रत्नाकर गायकवाड, आता आहेत मिलिंद शंभरकर ; तरीही जुळून आला तुषार ठोंबरेंचाही योग

  

सोलापूर : राज्याचे उपमुख्यमंत्री देवेंद्र फडणवीस यांच्या हस्ते मोठ्या थाटात अनेक दिवसांपासून रखडलेल्या नूतन महसूल भवन अर्थात जिल्हाधिकारी कार्यालयाचा उद्घाटन सोहळा संपन्न झाला. या कार्यक्रमाला विद्यमान जिल्हाधिकारी मिलिंद शंभरकर हे मसूरी या ठिकाणी प्रशासकीय ट्रेनिंग साठी असल्याने त्यांना या कार्यक्रमाला उपस्थित राहता आले नाही परंतु त्यांची कसर अतिरिक्त जिल्हाधिकारी तुषार ठोंबरे यांनी भरून काढली. या कार्यक्रमाला निश्चितच शंभरकर यांनी खूपच मिस केले असेल.

 

काही योग असे जुळून येतात की, त्याची चर्चा कायमच होत राहते. जुने जिल्हाधिकारी कार्यालय जे आता आहे त्या कार्यालयाच्या इमारतीचे उद्घाटन तत्कालीन राज्याचे वित्त व नियोजन मंत्री सुशीलकुमार शिंदे यांच्या हस्ते 3 जानेवारी 1987 रोजी झाले होते त्यावेळी जिल्हाधिकारी पदी रत्नाकर गायकवाड होते. 36 वर्षानंतर जिल्हाधिकारी कार्यालय आता नव्या वास्तूमध्ये स्थलांतरित होत आहे.

नव्या जिल्हाधिकारी कार्यालयाचा पायाभरणी शुभारंभ 2009 साली सुशीलकुमार शिंदे हे राज्याचे ऊर्जामंत्री आणि त्या वेळचे कृषी मंत्री शरद पवार यांच्या हस्ते करण्यात आला होता. 2009 ते 2023 दरम्यान अनेक जिल्हाधिकारी होऊन गेले शेवटी योग होता तो मिलिंद शंभरकर यांचाच.

परंतु अचानक शंभरकर यांना मसुरी या ठिकाणी प्रशिक्षणासाठी जावे लागले. जिल्हाधिकारी पदाचा कार्यभार घेण्याचा योग तुषार ठोंबरे यांना आला आणि ठोंबरे यांच्या उपस्थितीतच या नूतन जिल्हाधिकारी कार्यालयाचे लोकार्पण झाले. 

आपण योग हा शब्द अनेक वेळा वाचला परंतु तो योग आहे तरी कशाचा? तर हा योग म्हणजे 1987 साली जिल्हाधिकारी असणारे रत्नाकर गायकवाड हे बौद्ध होते. 2023 साली आता विद्यमान जिल्हाधिकारी मिलिंद शंभरकर हे सुद्धा बौद्ध आहेत. आणि शंभरकर हे जरी उद्घाटन कार्यक्रमाला नसले तरी त्यांचा प्रभार असणारे जिल्हाधिकारी तुषार ठोंबरे हे सुद्धा बौद्ध आहेत हा योगच म्हणावा लागेल.