महाराष्ट्र प्रदेश काँग्रेसचे अध्यक्ष नाना पटोले हे येत्या 31 ऑगस्ट रोजी सोलापूर दौऱ्यावर आहेत त्या पार्श्वभूमीवर काँग्रेस पक्ष जोरदार तयारी करताना दिसत आहे कॉंग्रेस भवनात मागील तीन दिवसांपासून कायम बैठका सुरू आहेत, शहराध्यक्ष प्रकाश वाले हे दिवसभर काँग्रेस भवनात थांबून नियोजन करत आहेत.
बुधवारी सायंकाळी पाचच्या सुमारास प्रमुख पदाधिकारी कार्यकर्त्यांच्या बैठकीचे आयोजन काँग्रेस भवनात करण्यात आले होते या बैठकीदरम्यान शहराध्यक्ष प्रकाश वाले आणि माजी परिवहन सभापती केशव इंगळे यांच्यात चांगलीच हमरीतुमरी झाल्याचं माहिती समोर आली आहे एकमेकांच्या अंगावर सुद्धा धावून गेल्याची माहिती मिळाली याबाबत काँग्रेसच्या काही कार्यकर्त्यांकडून माहिती घेतली असता असे समजले की माजी परिवहन सभापती केशव इंगळे हे तावातावाने उठले त्यांनी प्रकाश वाले यांच्यावर निशाणा साधला वाले बैठकीला बोलवत नाहीत, बोलू देत नाहीत त्यामुळे त्यांना अध्यक्षपद सांभाळता येत नाही तर राजीनामा द्यावा अशी मागणी केली यावेळी इंगळे यांना काहीजनांनी समजावण्याचा प्रयत्न केला मात्र वाद एवढा होता की एकमेकांच्या अंगावर धावून जाण्यापर्यंत सुद्धा प्रसंग आला होता.
दरम्यान वाले हे भाषण करायला उठले कार्यकर्त्यांच्या अशा वागण्याने वैतागलेल्या वाले यांनी थेट अध्यक्षपदाचा राजीनामा देतो असे भाषणात घोषणा केली त्यानंतर बैठकीला उपस्थित असलेल्या अनेक पदाधिकाऱ्यांनी इंगळे यांचा निषेध नोंदवला त्यांचं वागणं बरोबर नाही वाले यांचे अनेकांनी समर्थन केले भटक्या विमुक्त विभागाचे युवक शहराध्यक्ष पवन गायकवाड यांनी तर वाले यांच्या समर्थनार्थ राजीनामा दिल्याची माहिती मिळाली आहे. प्रकाश वाले यांच्याशी संपर्क साधला असता पक्षांतर्गत वाद होता तो मिटला त्याला एवढं महत्व देण्याचे कारण नाही असे सांगून बोलणे टाळले.
दरम्यान शहराध्यक्ष बदलाची चर्चा ऐकण्यास मिळत असताना असा प्रसंग घडला त्याच पार्श्वभूमीवर आता प्रदेशाध्यक्ष नाना पटोले हे सोलापूर दौऱ्यावर येत आहेत बुधवारी घडलेला प्रसंग निश्चितच प्रदेश कार्याध्यक्ष आमदार प्रणिती शिंदे तसेच ज्येष्ठ नेते सुशीलकुमार शिंदे यांच्या कानावर जाईल आता पक्ष काय निर्णय घेते याकडे सर्वांचे लक्ष लागून राहिलं आहे.
