सोलापुरात दोन कोटीचे ड्रग्स जप्त ; दोघांना चार दिवसांची पोलिस कोठडी
सोलापूर शहरात तब्बल एक किलो एम.डी. (मेफेड्रोन) नावाचा अंमली पदार्थ मिळून आला असून त्याची किंमत सुमारे दोन कोटी रुपये एवढी आहे. या प्रकरणात दोघा संशयितांना ताब्यात घेण्यात आले आहे. चार दिवस पोलिस कोठडी सुनावण्यात आली आहे.
अरविंद माने, वरिष्ठ पोलीस निरीक्षक, गुन्हे शाखा यांच्या मार्गदर्शनाखाली दि. 12/05/2026 रोजी सकाळी 06.00 वा. गुन्हे शाखेकडील नेमणूकीस असलेले सपोनि दत्तात्रय काळे व त्यांचे तपास पथक सोलापूर शहर हद्दीमध्ये पेट्रालिंग करीत असताना पोशि भारत पाटील यांना गोपनिय खबर मिळाली की मुस्लीम कब्रस्तान, व्ही.आय.पी. रोडकडून संगमेश्वर कॉलेजकडे जाणाऱ्या सार्वजनिक रोडच्या कडेला एक संशयीत कार उभी असून त्यामध्ये अंमली पदार्थ असण्याची दाट शक्यता आहे. त्यानुसार नमुद पथकाने सदर ठिकाणानजीक जावून गोपनीयरित्या पाहणी केली असता एक पांढऱ्या रंगाची ह्युन्डाई व्हेन्यु कंपनीची कार क्रमांक MH-13 ES- 1411 ही संशयीत रित्या उभी असल्याची दिसले.
सदर वाहनाबाबत तात्काळ अरविंद माने वरिष्ठ पोलीस निरीक्षक गुन्हे शाखा यांना अवगत करून त्यांना नमुद ठिकाणी बोलावून घेतले. त्यानंतर त्यांच्या सूचनेप्रमाणे व मार्गदर्शनाखाली नमुद कारला गराडा घालुन चालक सिटवर बसलेल्या व्यक्तीस ताब्यात घेतले. त्याचेकडे केलेल्या चौकशीत त्याचे नाव रिजवान शब्बीर खान वय 26 वर्षे रा. घर नं. 123 अंबिका नगर भाग-3, उमर खलीफा मस्जिदजवळ, नई जिंदगी, सोलापूर असे असल्याचे आढळले.
त्यानंतर दोन पंचांसमक्ष सपोनि दत्तात्रय काळे व तपास पथक यांनी ताब्यात घेतलेल्या इसमाची व नमुद कारची झडती घेतली असता कारमध्ये ड्रायव्हींग सिटच्या डाव्या बाजुस असलेल्या ड्रॉवरमध्ये एक राखाडी रंगाची प्लास्टीक पिशवी मिळून आली. सदर पिशवीमध्ये पांढऱ्या रंगाचा स्फटीक पदार्थ दिसुन आला. सदर पांढऱ्या पदार्थाबाबत ताब्यात घेतलेल्या इसमाकडे विचारणा केली असता, सदर पदार्थ हा एम.डी. (मेफेड्रोन) नावाचा अंमली पदार्थ असल्याचे त्याने सांगितले.
त्यामुळे तात्काळ पोलीस आयुक्तालय सोलापूर शहर कडील फॉरेन्सिक टिमला पाचारण करून सदर पांढऱ्या रंगाच्या पदार्थची रासायनीक तपासणी केली. सदरची पावडर ही Mephedrone (एम.डी.) अंमली पदार्थ असल्याचे निष्पन्न झाले. सदर प्रकरणी एनडीपीएस अॅक्ट अन्वये कायदेशीर प्रक्रिया पार पाडत सविस्तर पंचनामा करण्यात आला. त्यानंतर रिजवान शब्बीर खान याचेकडे अधिक चौकशी केली असता त्याने Mephedrone (एम.डी.) अंमली पदार्थ असलेली प्लास्टीक पिशवी ही इसम नामे साहील पिरजादे रा. सोलापूर व एक अनोळखी इसम यांनी अफजल मुर्शद रा. मुस्लीम कब्रस्तान जवळ, सोलापूर याचेकडे दिली होती व अफजल मुर्शद याने सदरची पिशवी ही कारच्या ड्रावरमध्ये ठेवली असल्याचे सांगितले.
त्यानुसार इसम नामे- 1) रिजवान शब्बीर खान वय- 26 वर्षे रा. घर नं. 123 अंबिका नगर भाग-3, उमर खलीफा मस्जिदजवळ, नईजिंदगी, सोलापूर, 2) साहील सिकंदर पिरजादे रा. सोलापूर, 3) अफजल मुर्शद रा. मुस्लीम कब्रस्तान जवळ, सोलापूर यांचे विरूध्द सदर बझार पोलीस ठाणे, सोलापूर शहर येथे गु.र.नं.- 378/2026 एन.डी.पी.एस. अॅक्ट कलम 8 (क), 21 (क), 29 अन्वये गुन्हा दाखल करण्यात आला.
सदर गुन्ह्याचा पुढील तपास गुन्हे शाखेकडील सहा. पोलीस निरीक्षक दत्तात्रय काळे हे करीत असून आरोपी नामे 1) रिजवान शब्बीर खान व 2) साहील सिकंदर पिरजादे वय 25 रा. फ्लॅट नं. 406 अल्तमश अपार्टमेंट मंत्रीचंडक नगर, सोलापूर यांना अटक केली आहे. नमुद आरोपींना 04 दिवस पोलीस कोठडी सुनावण्यात आली आहे.
