म्हेत्रे, साठे, माळगे, चव्हाण, पाटील, काळजेंच्या अनुपस्थितीत शिंदे गटाची निवडणूक नियोजन बैठक ; शिवाजी सावंत म्हणाले, जीवाचे रान करणार…
सोलापूर : आगामी महानगरपालिका, जिल्हा परिषद आणि पंचायत समिती निवडणुकीच्या पार्श्वभूमीवर उपमुख्यमंत्री एकनाथ शिंदे यांच्या शिवसेनेच्या गटाची महत्त्वाची बैठक शासकीय विश्रामगृहावर सोलापूर जिल्हा संपर्कप्रमुख प्राध्यापक शिवाजी सावंत यांच्या उपस्थितीत गुरुवारी संपन्न झाली.
ही बैठक नुकतेच शिवसेनेत गेलेले माजी मंत्री सिद्धाराम म्हेत्रे, लोकसभा संपर्कप्रमुख महेश साठे, महिला आघाडीच्या जिल्हाप्रमुख अनिता माळगे जिल्हाप्रमुख मनीष काळजे, जिल्हाप्रमुख अमर पाटील, शहर प्रमुख सचिन चव्हाण यांच्या अनुपस्थितीत झाल्याने शिवसेनेतील अंतर्गत गटबाजी उघड झाल्याचे दिसून येते.
शिवाजी सावंत यांच्या अध्यक्षतेखाली झालेल्या बैठकीला जिल्हाप्रमुख अमोल शिंदे, लक्ष्मीकांत ठोंगे पाटील, माजी मंत्री उत्तम प्रकाश खंदारे, दिलीप कोल्हे, हरिभाऊ चौगुले उमेश गायकवाड, सोमेश क्षीरसागर, संजय सरोदे, राजू शिंदे यांच्यासह महिला आघाडीच्या पदाधिकारी कार्यकर्ते मोठ्या संख्येने उपस्थित होते.
बैठकीदरम्यान पत्रकारांशी बोलताना सावंत म्हणाले, आगामी स्थानिक स्वराज्य संस्थांच्या निवडणुकीची तयारी बैठक आहे या निवडणुकीत शिवसेना पूर्ण ताकतीने उतरणार असून महापालिका आणि जिल्हा परिषदेवर शिवसेना महायुतीचा भगवा फडकवल्याशिवाय राहणार नाही त्यासाठी जीवाचे रान करणार अशी भूमिका मांडली.
दरम्यान या बैठकीला सिद्धाराम म्हेत्रे, महेश साठे, अनिता माळगे, मनीष काळजे, सचिन चव्हाण, अमर पाटील हे नेते अनुपस्थित असल्याचा मुद्दा पत्रकारांनी उपस्थित केला.
तुम्हाला अंतर्गत गटबाजीचे चित्र दिसत आहे पण सर्वांना निमंत्रण दिले आहे, ते सर्व बाहेर आहेत आपले प्रतिनिधी त्यांनी पाठवलेत पण गटबाजीचे तुम्ही सारून ठेवा तुमच्यामुळेच गटबाजूचा खूप प्रसार होतोय अशी विनंती केली.
