महेश कोठेंचा ‘मास्टर स्ट्रोक’ ; शिवसेनेच्या या नेत्याला सोबत घेत दिला नाराजांना शह
सोलापूर : शहर उत्तर विधानसभा मतदारसंघातील शरदचंद्र पवार राष्ट्रवादी काँग्रेसचे उमेदवार महेश कोठे यांनी आता उद्धव बाळासाहेब ठाकरे शिवसेनेचे जिल्हाप्रमुख गणेश वानकर यांना सोबत घेऊन शिवसेनेतील नाराजांना चांगलाच शह दिला आहे.
महेश कोठे आणि शिवसेनेचे नेते पुरुषोत्तम बरडे यांच्यात कायमच राजकीय वाद राहिला आहे. कोठे हे शिवसेनेत असताना सुद्धा या दोन्ही नेत्यामध्ये सहसा जमले नाही. बरडे हे भाजपचे उमेदवार विजयकुमार देशमुख यांचे खास मित्र मानले जातात. दरम्यान बरडे यांनी पत्रकार परिषदेमध्ये कोठे यांनी पक्षाची जाहीर माफी मागितली तरच आम्ही प्रचारात सहभागी होऊ अशी भूमिका मांडली त्यावर कोठे यांनी सुद्धा बरडे यांच्यावर तोंडसुख घेतले होते.
महेश कोठे यांच्या प्रचारार्थ वानकर हे संपूर्ण ताकतीने सहभागी झाल्याचे दिसून आले. प्रचार रॅली मध्ये हे दोन्ही नेते एकत्र असल्याने कार्यकर्त्यांमध्ये ही उत्साह पाहायला मिळाला.
महेश कोठे यांनी आता शिवसेना माझ्यासोबत असल्याने विजय निश्चित असल्याचा दावा केला.
तर गणेश वानकर यांनी आजपर्यंत शिवसेना भाजप सोबत होती त्यामुळे त्यांचा विजय व्हायचा पण आता कोठे यांच्यासोबत असल्याने मोठ्या मताधिक्याने ते विजयी होतील असे सांगितले.
