शोभा बनशेट्टी यांच्या उमेदवारीची जोरदार चर्चा ; भाजप प्रदेशच्या मोठ्या नेत्याची निवासस्थानी सदिच्छा भेट
सोलापूर : सोलापूर शहर उत्तर या विधानसभा मतदारसंघातून माजी महापौर शोभा बनशेट्टी यांच्या उमेदवारीची चर्चा आता जोरदार रंगली आहे. त्यामुळे आगामी विधानसभा निवडणुकीत भारतीय जनता पार्टीला या मतदारसंघात आता पर्याय निर्माण झाल्याचे बोलले जात आहे.
भारतीय जनता पार्टी सोलापुरातून प्रथमच एका महिलेला आमदारकीची संधी देऊन पक्षाची शोभा वाढवणार का? असे प्रश्न आता या निमित्ताने उपस्थित होऊ लागले आहेत.
याच दरम्यान भारतीय जनता पार्टी व्हीजेएनटी सेलचे प्रदेशाध्यक्ष सुनील केंद्रे यांनी बनशेट्टी यांच्या निवासस्थानी सदिच्छा भेट दिली. त्यामुळे तर या चर्चेला आणखीच उधान आल्याचे दिसत आहे. श्रीशैल बनशेट्टी आणि शोभा बनशेट्टी यांनी केंद्रे यांचे आपले निवासस्थानी मनोभावे स्वागत केले. यावेळी बराच वेळ राजकीय चर्चाही झाल्याचे बोलले जात आहे.
मागील चार टर्म शहर उत्तरचे आमदार विजयकुमार देशमुख हे प्रतिनिधित्व करीत आहेत. लोकसभा निवडणुकीत जरी त्यांनी आपल्या मतदारसंघातून चांगले मताधिक्य देत पक्षाची इज्जत राखली असली तरी यंदा महाराष्ट्रात अनेक ठिकाणी उमेदवार बदलले जाणार असल्याची चर्चा ऐकण्यास मिळते. त्यामुळे भाजपशी एकनिष्ठ राहिलेल्या कार्यकर्त्यांना कुठेतरी आशेचा ‘किरण’ दिसण्यास सुरुवात झाली आहे.
