सोलापुरात 4 सहाय्यक पोलीस आयुक्त व 4 पोलीस निरीक्षकांना हलवले ; लोकसभेच्या तोंडावर पोलीस अधिकाऱ्यांच्या अंतर्गत बदल्या
सोलापूर : सोलापूर पोलीस आयुक्तालयातील पोलीस अधिकाऱ्यांच्या अंतर्गत बदल्याचे आदेश शुक्रवारी जारी झाले. फौजदार चावडी पोलीस ठाण्याचे वरिष्ठ पोलीस निरीक्षक विश्वनाथ बाळू सिद यांची बदली झाली असून त्यांना महिला सुरक्षा विशेष कक्षाची जबाबदारी सोपविण्यात आलीय. जेलरोड पोलीस ठाण्याचे वरिष्ठ पोलीस निरीक्षक जफर नासर बेग मोगल यांची बदली विशेष शाखेकडे करण्यात आलीय. जोडभावी पेठ पोलीस ठाण्याचे वरिष्ठ पोलीस निरीक्षक राजेंद्र हनुमंत करणकोट यांना नियंत्रण कक्ष देण्यात आले असून नियंत्रण कक्षातील पोलीस निरीक्षक मानसिंग श्रीनिवास खोचे यांची बदली सलगर वस्ती पोलीस स्टेशनला करण्यात आली आहे.
विभाग – ०१ चे सहाय्यक पोलीस आयुक्त संतोष बाबुराव गायकवाड यांची नवीन नेमणूक विशेष शाखेकडे करण्यात आलीय तर विशेष शाखेकडील सहाय्यक पोलीस आयुक्त अशोक शामराव तोरडमल यांना नवीन नेमणूक विभाग – ०१ कडे देण्यात आलीय. शहर वाहतूक शाखेतील सहाय्यक पोलीस आयुक्त अजय आर परमार यांच्यावर नव्या नेमणुकीचे ठिकाण म्हणून विभाग – ०२ ची जबाबदारी देण्यात आली आहे तर विभाग – ०२ चे सहाय्यक पोलिस आयुक्त राजू धोंडीबा मोरे यांच्या नव्या नेमणुकीचे ठिकाण नियंत्रण कक्ष असणार आहे.