सोलापूर : आमदार तथा प्रदेश संयोजक श्रीकांत भारतीय हे काही दिवसापूर्वी सोलापूर दौऱ्यावर येऊन गेले. आगामी लोकसभा आणि विधानसभा निवडणुकीच्या पार्श्वभूमीवर त्यांनी उमेदवारांची चाचणी सुद्धा केली आहे. काही नेत्यांच्या त्यांनी गुप्त भेटी घेतल्या. यावरून सोलापूर जिल्ह्यातील भाजपचे उमेदवार बदलले जाणार का अशीही चर्चा आता सुरू झाली आहे.
काही महिन्यात महानगरपालिका निवडणूक लागेल त्यानंतर लोकसभेच्या निवडणुका आहेत त्या निवडणुकीच्या पार्श्वभूमीवर भारतीय जनता पार्टीमध्ये शहर पातळीवर नवीन नेतृत्वाचा शोध घेतला जात असल्याची चर्चा कार्यकर्त्यांमधून ऐकण्यास मिळाली.
पक्षात प्रदेशाध्यक्ष बदलल्यानंतर साधारण खालची फळी बदलली जाते व मे महिन्यात होणाऱ्या कर्नाटक विधानसभा निवडणुकीनंतर शहरात संघटनात्मक बदल होणार असल्याचे सांगितले जात असून, याकरिता इच्छुकांनी फिल्डिंग लावण्यास सुरुवात केली आहे.
विद्यमान शहराध्यक्ष विक्रम देशमुख यांनी 2019 लोकसभा निवडणुकीनंतर शहराध्यक्ष पदाची जबाबदारी घेतली व त्यांचा कार्यकाळ ऑक्टोबर 2022 महिन्यात संपला असून, नूतन प्रदेशाध्यक्ष चंद्रशेखर बावनकुळे यांच्या निवडीनंतर राज्यात संघटनात्मक बदलाच्या हालचाली सुरू झाल्या आहेत, सोलापूर शहरात लोकसभा व महापालिका निवडणुकीच्या अनुषंगाने ऊर्जावान व संघटनेला वेळ देणाऱ्या व्यक्तीचा शोध सुरू असल्याचं कळतंय.
भारतीय जनता पार्टीत बूथ यंत्रणा ही अत्यंत महत्वाची असून, प्रदेशाध्यक्ष बावनकुळे स्वतः राज्यभरात बूथ सक्षमीकरण बैठका आढावा घेत फिरत आहेत, त्यांच्या सुचनेंनंतर देखील शहरातील अनेक बूथ कमिट्या अपूर्ण असल्याने प्रदेशाध्यक्ष बावनकुळे सोलापूरच्या कारभारावर नाराज असल्याची चर्चा भाजपच्या कार्यकर्त्यांमध्ये आहे.
पदासाठी फिल्डिंग…काय आहे समीकरण… कोण आहेत चर्चेत
शहराध्यक्ष पदासाठी पुन्हा माजी शहराध्यक्ष अशोक निंबर्गी, माजी सरचिटणीस हेमंत पिंगळे, माजी सभागृह नेता शिवानंद पाटील, अनंत जाधव, जगदीश पाटील, चन्नवीर चिट्टे, रोहिणी तडवळकर, पांडुरंग दिड्डी, नागेश वल्याळ यांची नावे चर्चेत आहेत. पद निवडीवरून सोलापूरच्या दोन्ही आमदार देशमुख यांची गटबाजी चव्हाट्यावर येते हा आजपर्यंतचा भाजपला अनुभव आहे. त्यामुळे यंदा शहराध्यक्ष निवडताना प्रदेश पातळीवर कामाचा अनुभव पाहून विचार व्हावा अशी अपेक्षा भाजपच्या कार्यकर्त्यांना आहे.
BRS पक्षाच्या डोकेदुखीमुळे तेलगू भाषिक नाव येण्याची ही शक्यता
सोलापूरच्या भाजपमध्ये पूर्व भागातील तेलगू भाषिकांचा भाजप मधील एक मोठा गट आहे. तेलगू भाषिकांना शहराध्यक्ष पद द्या अन्यथा सोलापूरात राजकीय एन्ट्री केलेल्या चंद्रशेखर राव यांचा BRS पक्ष लोकसभा व महापालिका निवडणुकीत डोकेदुखी ठरेल व पारंपरिक मतदार असलेला तेलगू भाषिक दुरावेल अशी भीती व्यक्त करत असून, जिल्हाध्यक्ष लिंगायत समाजाला दिल्याने शहराध्यक्ष मराठा किंवा तेलगू भाषिक दोघांपैकी एकाला जाईल अशी शक्यता वर्तवली जात आहे.
एकूणच सोलापूरची राजकीय आणि सामाजिक समीकरणे पाहता भाजप हायकमांड शहराध्यक्ष पदाची धुरा कोणाच्या हातात देणार हे पाहणे उत्सुकतेचे ठरणार आहे.
