सोलापूर : पंढरपुरात कार्तिकी एकादशीचा सोहळा मोठ्या उत्साहात साजरा होत आहे. राज्यामध्ये दोन उपमुख्यमंत्री असल्याने कार्तिकी एकादशीच्या महापूजेला कोण येणार? असा प्रश्न उपस्थित झाला. त्यावर वादंग ही उठले होते. शेवटी उपमुख्यमंत्री देवेंद्र फडणवीस यांच्या हस्ते हि महापूजा होणार असल्याचे फायनल झाले. फडणवीस साहेब येणार म्हटल्यानंतर पंढरपुरात त्यांच्या स्वागताचे मोठमोठे बॅनर लावण्यात आले.
पंढरपूर मंगळवेढा विधानसभा मतदारसंघाचे आमदार समाधान आवताडे यांनीही मोठ्या प्रमाणात स्वागत बॅनर लावले आहेत. माजी आमदार प्रशांत परिचारक यांचेही बॅनर सगळीकडे पाहायला मिळत आहेत. या दोन्ही नेत्यांसह राज्याचे आरोग्य मंत्री तानाजी सावंत यांचेही ठिकठिकाणी बॅनर आहेत ‘आरोग्याची वारी पंढरीच्या दारी’ या उपक्रमाखाली भैरवनाथ शुगर यांच्या सौजन्याने हे स्वागताचे बॅनर लावण्यात आले आहेत.
काही महिन्यांपूर्वीच राष्ट्रवादीचे नेते अजित पवार भारतीय जनता पार्टी व शिवसेनेच्या सोबत सत्तेमध्ये गेले आहेत. त्यामुळे आमदार समाधान आवताडे यांनी आपल्या प्रत्येक स्वागताच्या बॅनर मध्ये आवर्जून अजित दादा पवार यांचा फोटो लावून त्यांच्याप्रती आपली बांधिलकी जोपासण्याचे पाहायला मिळाले.
आरोग्य मंत्री तानाजी सावंत यांच्या मात्र स्वागताच्या बॅनर मध्ये अजित पवार हे पाहायला मिळत नाहीत. त्यांच्या बॅनर मध्ये देशाचे पंतप्रधान नरेंद्र मोदी, देशाचे गृहमंत्री अमित शहा, यांच्यासोबत राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस यांचे फोटो आहेत परंतु उपमुख्यमंत्री अजित पवार यांचा फोटो दिसत नाही. हे बॅनर पंढरपूर मध्ये चर्चेचा विषय ठरल्याचे पाहायला मिळाले.
