सोलापूरच्या शेळगी भागात युवकाचा खून ; दोन संशयितांना अटक
एका २० वर्षीय तरुणाचा डोक्यात, डोळ्यावर लोखंडी स्टॅन्डने वार करून खून करण्यात आला. ही घटना शनिवारी (दि.२८) रात्री साडेदहा वाजण्याच्या सुमारास घडली. युवराज प्रभूलिंग स्वामी वय २०, रा. शिवगंगा नगर, शेळगी असे मृत तरुणाचे नाव आहे.
या घटनेची माहीती अशी की, शेळगी येथील शिवगंगा नगर येथे राहणाऱ्या युवराज प्रभूलिंग स्वामी आणि संशयित आरोपी विजय उर्फ सोनू बनसोडे व सुजल मरबे दोघे राहणार दहिटणे यांच्यात मैत्री होती. युवराज स्वामी हा रिक्षा चालक असल्याचे समजते. त्यांच्यात यापूर्वी भांडण झाले होते. या भांडणाचा राग मनात धरून शनिवारी रात्री साडेदहा वाजण्याच्या सुमारास विजय बनसोडे व सुजल मरबे या दोघांनी युवराज यास मोटरसायकलवर बसवून शेळगी दहिटणे रस्त्यावरील निर्जन स्थळी नेऊन युवराज स्वामी यास मारहाण केली. त्याच्या डोळ्यावर, डोक्यावर गंभीर स्वरूपाचे वार करून त्याचा खून केला.
ही घटना जोडभावी पेठ पोलीसांना समजताच संपूर्ण पोलीस पथक त्याठिकाणी पोहचले. गंभीर अवस्थेत असलेल्या त्या तरुणास उपचारासाठी शासकीय रुग्णालयात दाखल केले. परंतु उपचारापूर्वीच त्याचा मृत्यू झाल्याचे डॉक्टरांनी सांगितले. याबाबत त्याचा भाऊ नागेश प्रभुलिंग स्वामी वय १८यांनी जोडभावी पेठ पोलीस ठाण्यात विजय बनसोडे व सुजल मरबे या दोघांनी माझ्या भावाचा खून केल्याची फिर्याद जोडभावी पेठ पोलीस ठाण्यात दिली आहे. दरम्यान जोडभावी पेठ पोलीस ठाण्याच्या पथकाने तपास करून दोघा संशयित आरोपींना ताब्यात घेतले आहे.
