सोलापुरात मुख्यमंत्र्यांना शुभेच्छा अन् दुसरीकडे मनीष काळजे यांच्या भावी आमदारकीची चर्चा
सोलापूर : राज्याचे मुख्यमंत्री एकनाथ शिंदे यांचा शुक्रवारी वाढदिवस होता त्या वाढदिवसानिमित्त त्यांच्यावर महाराष्ट्रातून सर्व स्तरातून शुभेच्छांचा वर्षाव झाला. सोलापुरातूनही शिवसेनेच्या नेत्यांनी त्यांना शुभेच्छा दिल्या.
जिल्हाप्रमुख मनीष काळजे यांचे विशेष करून शहराच्या मध्यवर्ती भागात अनेक पोस्टर दिसून आले. सात रस्ता येथील कार्य पेट्रोल पंपाच्या कोपऱ्यावर तर लावण्यात आलेले डिजिटल बॅनर तर काळजे यांच्या डिजिटलचा मुख्य स्पॉट झाल्याचं पाहायला मिळतो.
एकीकडे मुख्यमंत्र्यांचा वाढदिवस आणि दुसरीकडे मनीष काळजे यांचा भावी आमदार असा उल्लेख म्हणून होत आहे. त्याचीही आता चर्चा होताना ऐकण्यास मिळते. विशेष करून शहरातील अल्पसंख्यांक समाजातून मनीष काळजे यांना भावी आमदार म्हणून शुभेच्छा देण्यात आल्या आहेत.
काळजे यांनी मुख्यमंत्री एकनाथ शिंदे यांच्याकडून आणलेला निधी सोलापूर शहर मध्य या विधानसभा मतदारसंघात मोठ्या प्रमाणात खर्ची पडला आहे. त्यामध्ये सर्वाधिक निधीचा विनियोग हा मुस्लिम लोकवस्तीच्या भागामधील विकास कामांसाठी वापरल्याचे पाहायला मिळते.
सोलापूर शहर मध्य हा मतदारसंघ महायुती मधून शिवसेनेला जातो. त्यासाठी काळजे हे मध्यमधून इच्छुक आहेत. काळजे यांच्या सोबतच शिवसेनेचे जिल्हा संपर्कप्रमुख प्राध्यापक शिवाजी सावंत यांनी सुद्धा आरोग्य शिबिराच्या माध्यमातून जोरदार मोर्चेबांधणी केली आहे. त्यासाठी येणाऱ्या विधानसभा निवडणुकीमध्ये शिवसेनेकडून उमेदवारी मिळवण्यात कोण यशस्वी होते हे मात्र पाहणे महत्त्वाचे ठरणार आहे.
