धैर्यशील मोहितेंनी दाखवलेल्या ‘रेकॉर्डिंग गॉगल’ची चर्चा ; तसा गॉगल कोण लावला होता?
सोलापूर : विधान परिषद निवडणुकीचे मतदान सोलापुरात मोठ्या चुरशीने पार पडले. 615 पैकी 614 जणांनी मतदान केले त्यामुळे आता निकाल काय याकडे सर्वांच्या नजरा लागल्या आहेत.
दरम्यान सोलापुरात सर्वाधिक मतदान असलेल्या उत्तर सोलापूर तहसील कार्यालयात मतदानादिवशी रेकॉर्डिंग कॅमेरा असलेला गॉगल भाजपच्या एका मतदारांनी लावून मतदान करायला आल्याचे राष्ट्रवादीचे खासदार धैर्यशील मोहिते पाटील यांनी मिडियाला सांगितले. निवडणूक अधिकाऱ्यांना त्या गॉगलचा संशय आल्यावर त्यांनी तो काढायला सांगितल्याचे मोहिते पाटील म्हणाले. त्यांनी तसा गॉगल सुद्धा पत्रकारांना दाखवला.
याबाबत निवडणूक निर्णय अधिकारी कार्तिकेयन यांनी तशी कुणाची तक्रार आली नसल्याचे माध्यमांना सांगितले.
आता या रेकॉर्डिंग कॅमेरा गॉगल ची चर्चा रंगली आहे. गुरुवारी उत्तर सोलापूर तहसील मतदार केंद्रावर असे काही नेते वेगळाच गॉगल लावून आल्याचे पाहायला मिळाले. ते नेते इतर वेळी स्टायलिश गॉगल लावतात आज मात्र जरा वेगळाच गॉगल त्यांच्या डोळ्यावर दिसून आला. काही पत्रकारांनी त्यांना आज वेगळाच गॉगल दिसतोय म्हणून विचारले. त्या नेत्याच्या चेहऱ्यावरील त्या गॉगलने लक्ष वेधले तर होतेच पण माध्यम प्रतिनिधींना सुद्धा थोडा वेळ संशय आला होता जे मात्र नक्की.
