फडणवीसांना जमले नाही ते कल्याणशेट्टी यांनी केले ! कधीतरी विजय देशमुख यांनी सुभाष बापूंच्या घरी चहाला जावे
सोलापूर : सहकार निवडणुकीमध्ये पक्षीय राजकारण नसते असे बोलले जाते परंतु सोलापूर कृषी उत्पन्न बाजार समितीच्या निवडणुकीत आता थेट भाजप आमदार विरुद्ध भाजप आमदार अशी लढत होतानाचे चित्र आहे.
आमदार सचिन कल्याणशेट्टी यांच्या नेतृत्वाखाली तयार झालेल्या पॅनल मुळे नाराज आमदार सुभाष देशमुख यांनी स्वतंत्र पॅनल उभे केले आहे. त्यामध्ये (धनेश आचलारे काँग्रेस) वगळून भारतीय जनता पार्टीच्या कार्यकर्त्यांना त्यांनी उमेदवारी दिली आहे यामध्ये आता ज्येष्ठ आमदार विजयकुमार देशमुख हे सुद्धा बापू सोबत उभे राहणार आहेत.
या एकूणच राजकीय घडामोडीनंतर सोलापुरात आता अशी एक चर्चा सुरू झाली आहे की जे मुख्यमंत्री देवेंद्र फडणवीस यांना जमले नाही ते एका सचिन कल्याणशेट्टी यांनी करून दाखवले ते म्हणजे दोन देशमुखांचे मनोमिलन.
सोलापुरातील दोन देशमुख आमदार यांच्यात किती पटते हे जग जाहीर आहे. कार्यकर्ते सुद्धा या दोन आमदारांमध्ये विखुरले गेले आहेत. हे कार्यकर्ते एकमेकांच्या विरोधात कुरघोड्या करताना पाहायला मिळते.
‘मी भारी का तू भारी’ यामध्येच दोन देशमुख आमदार दंग असतात असे बोलले जाते.
असे असतानाही सुद्धा यापूर्वी आमदार सुभाष देशमुख यांनी आमदार विजयकुमार देशमुख यांच्या निवासस्थानी भेट दिली होती आता पुन्हा बाजार समितीच्या निवडणूक निमित्ताने का होईना सुभाष देशमुख हे आपल्या मोठ्या मनाने विजयकुमार देशमुख यांच्या निवासस्थानी गेले आहेत.
विजयकुमार देशमुख यांनी सुद्धा एकदा तरी सुभाष देशमुख यांच्या निवासस्थानी जाऊन चहा घ्यावा अशी अपेक्षा आता भाजपचे कार्यकर्ते करू लागले आहेत. हे दोन नेते एकत्र झाले तर पक्षाला बऱ्याच गोष्टी साध्य करता येऊ शकतात परंतु ते वरवरून नको मनापासून एकदिलाने एकत्र व्हावेत अशी ही अपेक्षा कार्यकर्ते व्यक्त करतात.
