काँग्रेसच्या दोन्ही हातात शरद पवारांची तुतारी ; बाबा दादांचा सपोर्ट, प्रभाग वीसचे गणित असे जुळले!
सोलापूर : सोलापुरात काँग्रेसचा बालेकिल्ला म्हणून प्रसिद्ध असलेला प्रभाग क्रमांक 20 यंदाच्या निवडणुकीत रचना बदल झाल्याने 20 आणि 21 मधील नगरसेवकांना एकमेकांच्या समोर आणून ठेवले आहेत.
महाविकास आघाडीच्या जागा वाटपामध्ये प्रभाग क्रमांक 20 मध्ये दोन जागा काँग्रेस आणि दोन जागा शरदचंद्र पवार राष्ट्रवादी काँग्रेस लढवत आहे. यंदाच्या निवडणुकीत ज्येष्ठ नगरसेवक बाबा मिस्त्री यांनी निवडणुकीतून माघार घेतली आहे.
पण काँग्रेसने यंदा युवा उमेदवार माजी नगरसेवक जब्बार शेख यांचे चिरंजीव अजरोद्दीन शेख यांना उमेदवारी दिली आहे. तसेच माजी नगरसेविका अनुराधा काटकर या सुद्धा काँग्रेसच्या पॅनल मध्ये आहेत. दुसरीकडे शरदचंद्र पवार राष्ट्रवादी काँग्रेस कडून काँग्रेसचे ज्येष्ठ दिवंगत नेते नागनाथ रणधिरे यांचे नातू सिद्धार्थ श्रीशैल रणधिरे यांनी तुतारी हातात घेतले आहे त्यांच्या सोबतीला नुसरत शकील शेख या निवडणूक रिंगणात आहेत.
या निवडणुकीत काँग्रेस राष्ट्रवादी पॅनलने दोन मुस्लिम, एक बौद्ध आणि एक ओबीसी उमेदवार दिल्याने ही पॅनल सर्वसमावेशक झाले आहे. या पॅनलला ज्येष्ठ नगरसेवक बाबा मिस्त्री व ज्येष्ठ नगरसेवक प्रवीण निकाळजे यांचा सपोर्ट राहणार आहे. या दोन्ही नेत्यांच्या मार्गदर्शनाखाली पॅनलचे कामकाज सुरू असून प्रचाराला सुरुवात झाली आहे.
यापूर्वी अनुराधा काटकर यांनी या प्रभागात पाच वर्षे काम केल्याने त्यांची चांगली ओळख आहे. बौद्ध आणि मुस्लिम समाजात सिद्धार्थ रणधिरे यांचे वडील श्रीशैल रणधिरे यांना मानणारा मोठा वर्ग आहे अजरोद्दीन शेख आणि शकील बिल्डर हे सर्वच समाजात परिचित असल्याने या निवडणुकीत निश्चितच हे पॅनल बाजी मारेल अशी अपेक्षा आहे.
