सोलापूर : उपमुख्यमंत्री अजित पवार यांच्या बंडखोरी नंतर महाराष्ट्रात शरद पवार आणि अजित पवार असे दोन गट राष्ट्रवादी काँग्रेसमध्ये झाले आहेत यानंतर सोलापूर जिल्हा राष्ट्रवादी काँग्रेसची पहिलीच बैठक छत्रपती संभाजी महाराज चौकातील फर्न हॉटेलच्या सभागृहात घेण्यात आली. बैठकीच्या अध्यक्षस्थानी जिल्हाध्यक्ष बळीराम साठे होते, सोलापूरचे निरीक्षक शेखर माने, पंढरपूरचे नेते अभिजीत पाटील, मोहोळचे रमेश बारसकर शहराध्यक्ष भारत जाधव, पश्चिम महाराष्ट्र महिला अध्यक्ष कविता म्हेत्रे, जिल्हा महिला अध्यक्ष सुवर्णा शिवपुरे, माजी जिल्हा परिषद अध्यक्ष जयमाला गायकवाड, महेश माने, प्रल्हाद काशीद, बिपिन करजोळे यांच्यासह तालुकाध्यक्ष, पदाधिकारी कार्यकर्ते मोठ्या संख्येने उपस्थित होते.
शेखर माने म्हणाले, राष्ट्रवादी काँग्रेस पक्षात बंड सुद्धा नाही आणि बंडखोरी पण नाही काही लोक आपल्या स्वार्थासाठी पक्ष सोडून गेले आहेत. आमचा राष्ट्रवादी काँग्रेस पक्ष आहे आणि तो शरद पवारांचा आहे त्यामुळे शरद पवारांवर आमचा विश्वास आहे. पक्षातील काही लोक बाहेर पडले असतील मात्र पक्षातील सामान्य कार्यकर्ता पदाधिकारी शरद पवार यांच्या नेतृत्ववर विश्वास ठेवून इथ उपस्थित आहे. काही नेते गेले म्हणून पक्ष जात नाही. पदाधिकारी गेले म्हणून पक्षाला काही फरक पडत नाही एक गेला तर दुसरा येतो. त्यामुळे येणाऱ्या 2024 मध्ये पुन्हा राष्ट्रवादी काँग्रेस पक्ष शरद पवार यांच्या नेतृत्वाखाली एक नंबर वर राहील असा विश्वास व्यक्त करत सोलापूर जिल्ह्यातील सर्व पदाधिकारी कार्यकर्ते यांनी पवारांच्या पाठीशी खंबीर उभे राहण्याचा निर्धार आजच्या बैठकीमध्ये केला आहे.
काका साठे म्हणाले, भविष्यात भारतीय जनता पार्टीला देशात एकपक्षीय पद्धती आणायची आहे. कार्यकर्त्यांनी हे लक्षात घ्यायला पाहिजे त्यांनी सुरुवातीला शिवसेना फोडली आता राष्ट्रवादी फोडली. इतर पक्षही फोडतील आणि देशांमध्ये आपलं बहुमत कसे होणार हे त्यांचे राजकीय षडयंत्र आहे. 2024 ला त्यांच्या हातात सत्ता गेली तर पुन्हा देशात निवडणूका हे नावच राहणार नाही. त्यासाठी आपण सावध राहिले पाहिजे. शरद पवार यांच्या पाठीशी आज आपण आहोत पण ज्यावेळी परीक्षा येईल त्यावेळेस त्यांच्या पाठीशी खंबीरपणे राहील तोच सच्चा कार्यकर्ता असणार असे ते म्हणाले.
माध्यमांशी बोलताना त्यांनी शरद पवार यांची जिल्ह्यात ताकद नक्कीच राहणार असे सांगून आम्ही रोज लोकांसमोर जात आहे विचारत आहे. आम्ही शरद पवार यांच्याच पाठीशी आहोत असे उत्तर मिळत आहेत. उद्या भाजपच्या स्टेजवर अजित पवार आले तरी त्यांच्या विरोधात लढण्याची आमची तयारी आहे असेही ते म्हणाले.
