कार्यक्रम वाढदिवसाचा, भाषणं रंगली महापालिकेच्या सत्तेची ; महाविकास आघाडीच्या चर्चेत “ठाकरेंचा” विसर

सोलापूर : नगरसेवक तथा ताज सोशल ग्रुपचे अध्यक्ष तौफिक शेख यांचे चिरंजीव अदनान शेख यांच्या वाढदिवसानिमित्त सत्कार कार्यक्रमाचे आयोजन करण्यात आले होते. तौफिक शेख यांनी कार्यक्रमाला आपल्या सर्व राजकीय मित्रमंडळीना बोलावले होते, 

कार्यक्रमास महेश कोठे, सुधीर खरटमल, शफी इनामदार, संतोष पवार, भारत जाधव, दिलीप कोल्हे, अमोल शिंदे, चेतन नरोटे, प्रमोद गायकवाड, एम डी शेख, जुबेर बागवान, अजित बनसोडे, राजू कुरेशी असे राष्ट्रवादी, शिवसेना आणि काँग्रेसची मान्यवर नेतेमंडळीची उपस्थिती होती. सुधीर खरटमल, शफी इनामदार, अमोल शिंदे, महेश कोठे, चेतन नरोटे, संतोष पवार , दिलीप कोल्हे  यांनी आपल्या भाषणात महापालिकेवर सत्ता आणण्यासाठी एकत्रित येत प्रयत्न करू असे सांगितले.

सुरुवात  सुधीर खरटमल व शफी इनामदार यांनी केली, खरटमल म्हणाले, आम्ही सर्वजण सर्वधर्मसमभाव मानणारे नेते आहोत, जेव्हा एकत्र येतो तेव्हा चर्चा होते, ही एकी टिकवून ठेवणे गरजेचे असल्याचे सांगितले. इनामदार हे याठिकाणी जमलेले सर्व नेते असे म्हणत असतानाच तौफिक शेख यांनी महाविकास आघाडी म्हणा असे सांगताच महाविकास आघाडीच्या माध्यमातून निश्चितच महापालिकेत सत्ता येईल असा विश्वास व्यक्त केला. 

चेतन नरोटे म्हणाले, बॅनर वर जर शरद पवार असले तर आरिफ शेख यांच्या रुपात सुशीलकुमार शिंदे हे पण आहेत की .सोलापूर शहरात भाजपला हद्दपार करायचे असेल तर तिन्ही पक्ष एकत्र येण गरजेचे आहे, येणाऱ्या काळात शरद पवार व शिंदे साहेबांचेच विचार शहराला पुढे नेऊ शकतात त्यांचेच विचार मांडावे लागतील तरच महाविकास आघाडीची सत्ता येईल असे सांगितले. चेतन नरोटे यांनी भाषणात तिन्ही पक्षाची नावे घेतली , शरद पवार व सुशीलकुमार शिंदे यांचे ही नाव घेतले मात्र मुख्यमंत्री उद्धव ठाकरे यांचे नाव त्यांच्या तोंडी आले नाही

 त्यांच्या नंतर भाषणाला उठलेले शिवसेनेचे विरोधी पक्षनेते अमोल बापू यांनी, आपण एकटेच शिवसेनेचे इथं दिसतोय, मात्र चित्र पाहिलं तर निश्चितच भविष्यात महाविकास आघाडी म्हणूनच आपणाला हातात हात घालून काम करावे लागेल अशी अपेक्षा व्यक्त केली मात्र तेही महाविकास आघाडी ही ज्या शिवसेनेचे मुख्यमंत्री उद्धव ठाकरेंमुळे झाली त्यांचे नाव घेणे विसरले.

संतोष पवार यांनी आम्ही महापालिका निवडणुकीत महाविकास आघाडीसाठी प्रयत्नशील आहोत असे म्हणत आपली नजर काँग्रेसचे चेतन नरोटे यांच्याकडे वळवली काँग्रेसने स्वबळावर लढण्याची घोषणा केली, 102 उमेदवार घोषित केले मात्र महाविकास आघाडीने एकत्र लढवल्यास सत्ता येईल मात्र त्यांनी आपल्या शहराध्यक्ष यांना सांगावे अशी सूचना केली.