काँग्रेसच्या प्रणिती शिंदे या सोलापूर जिल्ह्यातील एकमेव महिला आमदार आहेत. 2019 च्या विधानसभा निवडणुकीत त्यांनी समोर असलेल्या दिग्गजांना टक्कर दिली होती. “एक नारी,सबपे भारी”असा नारा त्यावेळी घुमला होता. तसा दमदार विजय ही त्या निवडणुकीत त्यांनी मिळवला. त्यावेळेस त्यांच्या प्रचाराची रणनीती चर्चेचा विषय होती, सकाळी वॉकिंगच्या सुमारास नागरिकांच्या भेटी घेतल्या, नवरात्र असल्याने पहाटे त्या अनवाणी पायाने सोलापूरची कुलस्वामिनी रूपा भवानी मातेच्या दर्शनाला त्या गेल्या होत्या. त्यावेळी माध्यमांनी रूपाभवानी चरणी काय प्रार्थना केली, काय मागितले असे विचारले असता त्यांनी मी केवळ कृतज्ञता व्यक्त करण्यासाठी आलेय असे सांगितले होते.
त्यानंतर 2020 हे वर्ष कोरोना संसर्गाच्या सावटात गेले, मंदिरे बंद होती, यंदा 2021 साली मात्र ऐन नवरात्र उत्सवाच्या पहिल्याच दिवशी सर्व मंदिरे उघडण्यात आली, आमदार प्रणिती शिंदे यांनी सोमवारी रात्री पावणे अकरा वाजता मंदिरात जाऊन रूपा भवानी मातेचे दर्शन घेतले, तिथे माथा टेकवला त्याचा व्हिडीओ व्हायरल झाला आहे. आमदार प्रणिती ताईंना यंदा मातेकडे काय मागितले असे विचारले असता मी कधी मागायला जात नाही, दरवर्षी नवरात्र उत्सवात मातेच्या चरणी कृतज्ञता व्यक्त करते असे उत्तर त्यांनी दिले.
