सोलापूर : दक्षिण सोलापूर तालुक्यातील धोत्री या गावात सरपंच पुत्राने ग्रामसेवकाशी संगनमत करून शासनाचे लाखो रुपये परस्पर काढून भ्रष्टाचार केल्याची तक्रार गावच्या उपसरपंच यांनी मुख्य कार्यकारी अधिकारी दिलीप स्वामी यांच्याकडे करीत चौकशी करण्याची मागणी केली आहे.
धोत्री गावच्या उपसरपंच महानंदा मल्लप्पा चौगुले,बसवराज शरणप्पा पाटील,मडोळप्पा शंकर दहिटणे यांनी जिल्हा परिषदेचे पक्षनेते अण्णाराव बाराचारे यांच्या उपस्थितीत बुधवारी सीईओ स्वामी यांना निवेदन दिले.
निवेदनात चौगुले यांनी म्हंटलंय, मौजे धोत्री, ता. दक्षिण सोलापूर येथील सरपंच शांताबाई नारायण व्हटकर यांचा मुलगा प्रभाकर नारायण व्हटकर व ग्रामसेवक आय.बी. भोज यांनी लाखो रुपयाचे भ्रष्टाचार निदर्शनास आल्याने आपणांकडे दिनांक ९/९/२०२१ व दिनांक १५/११/२०२१ रोजी तसेच गटविकास अधिकारी (वर्ग-१), पंचायत समिती दक्षिण सोलापूर यांना दिनांक ०९/०९/२०२१ रोजी याबाबतचे लेखी तक्रार निवेदन सादर केलेले आहेत. परंतु आपणांकडून व गटविकास अधिकारी (वर्ग-१), पंचायत समिती दक्षिण सोलापूर यांच्याकडून माझ्या अर्जाची कोणतीही दखल न घेण्यात आलेली नसून आजतागायत कोणतीही चौकशी करण्यात आलेली नाही.
धोत्री येथील १) मातंग वस्ती समाज मंदिर बांधकाम, २) आंबेडकर वस्ती शाळा वॉल कंपाऊंड करणे, ३) आंबेडकर वस्ती शाळामध्ये बोअर मारणे, ४) मातंग वस्ती मध्ये बंदिस्त गटार करणे, ५) भिमनगर मधील 8) समाज मंदिर दुरुस्ती, ६) ढोर गल्ली मध्ये बंदिस्त गटार, ७) जलजन्य योजने अंतर्गत गांव अंतर्गत नळ कनेक्शन जोडणी, ८) भिमनगर मधील पिण्याच्या पाण्याचे विहिर दुरुस्ती व खोलीकरण, ९) अपंग निधी, १०) महिला बाल कल्याण निधी असलेली सर्व कामे १४वा व १५वा वित्त आयोगामधुन मंजूर करण्यात आलेली आहेत. परंतु नमूद कोणतीही कामे न करता ग्रामसेवक आय.बी. भोज व सरपंच शांताबाई नारायण व्हटकर यांचा पुत्र प्रभाकर नारायण व्हटकर यांच्या दोघांच्या संगनमताने लाखो रुपयाचा भ्रष्टाचार केलेला आहे. तसेच आय.बी. भोज व सरपंच श्रीमती. शांताबाई नारायण व्हटकर या दोघांनी संगनमत करुन पदाचा गैरवापकरुन लाखो रुपयांचे चेक दिलेले आहेत.
आय.बी. भोज व सरपंच श्रीमती. शांताबाई नारायण व्हटकर या दोघांनी संगनमत करुन पदाचा गैरवापर करुन वरीलप्रमाणे ग्रामपंचायत कर्मचारी, सरपंच मुलगा, सरपंच मुलगा याचा सहकारी व रोजगार सेवक यांच्या नावाने बेकायदेशीर धनादेश काढून लाखो रुपयाचा मोठा गैरव्यवहार व भ्रष्टाचार केले आहे. याबाबत आपण आपल्या स्तरावरुन चौकशी केल्यास मोठा भ्रष्टाचारा झाल्याचे निदर्शनास / उघडकीस येईल.
तसेच वरील सर्व कामे बांधकाम व पाणी पुवठयाचे खात्याचे जी.ए. श्री. बिराजदार यांनी कोणत्याही कामाचे एम.बी. केलेली नसताना बोगस कामे दाखवून बिले काढलेली आहेत. वरील सर्व कामांची वरील नमूद व्यक्तीच्या नावाने सरपंच व ग्रामसेवक यांनी संगनमतानी लाखो रुपयाचे चेक काढलेले आहेत.
तरी मौजे धोत्री, ता.दक्षिण सोलापूर येथील पाणी, आरोग्य व विद्युत हे दैनंदिनी जिवनावश्यक कामे सोडून बांधकाम, पाणी पुरवठा व इतर योजनांची सर्व कामांना स्थगिती मिळावी.
सदर कामांची लवकरात लवकर चौकशी न झाल्यास मौजे धोत्री, ता. दक्षिण सोलापूर च्या ग्रामपंचायत सदस्य व ग्रामस्तांच्या वतीने आंदोलन / उपोषण करण्यात येईल, याची नोंद घ्यावी.
