ब्रेकींग : चेतन नरोटे यांच्या प्रचारासाठी पूर्ण ताकदीने उतरणार ; फुलारे पती-पत्नीची नाराजी दूर
सोलापूर : काँग्रेस पक्षाच्या माजी गोल्डन नगरसेविका श्रीदेवी फुलारे आणि शहर मध्यचे काँग्रेस उमेदवार चेतन नरोटे यांच्यातील अनेक वर्षापासून असलेली नाराजी दूर करण्यात काँग्रेस नेत्यांना यश आले आहे.
सोमवारी सायंकाळी पाच वाजता जनवात्सल्य या निवासस्थानी माजी केंद्रीय गृहमंत्री सुशीलकुमार शिंदे, खासदार प्रणिती शिंदे, श्रीदेवी फुलारे, जॉन फुलारे, उमेदवार चेतन नरोटे, माजी आमदार प्रकाश यलगुलवार, माजी महापौर संजय हेमगड्डी यांच्यामध्ये बैठक झाली. या बैठकीत बराच वेळ चर्चा होऊन अखेर फुलारे दांपत्याची नाराजी दूर झाली. यावेळी काँग्रेस कार्यकर्तेही आनंदी झाल्याचे पाहायला मिळाले.
यावेळी माध्यमांशी बोलताना फुलारे म्हणाले, आम्ही काही कारणास्तव नाराज होतो परंतु आम्ही पक्ष सोडला नाही. आज ज्येष्ठ नेते सुशीलकुमार शिंदे आणि खासदार प्रणिती शिंदे यांनी चेतन नरोटे आणि आमच्यातील नाराजी समोर बसून दूर केली आता इथून उमेदवार चेतन नरोटे यांचा प्रचारात पूर्ण ताकतीने सक्रिय होणार असल्याचे सांगितले.
2017 च्या महानगरपालिका निवडणुकीनंतर काही अशा घटना घडल्या की श्रीदेवी जॉन फुलारे आणि चेतन नरोटे यांच्यामध्ये दुरावा निर्माण झाला. तेव्हा फुलारे यांनी काँग्रेस सोडण्याचा निर्णय घेतला परंतु त्या दुसऱ्या कोणत्याही पक्षात गेल्या नाहीत.
