“किती बी समोर येऊ द्या, त्यांना एकटा बास” सुभाष देशमुखांसाठी जुळली पॉझिटिव्ह समीकरणे
सोलापूर : नुकत्याच झालेल्या लोकसभा निवडणुकीत महाराष्ट्रामध्ये भारतीय जनता पार्टीला निगेटिव्ह वातावरण दिसून आले. तेच वातावरण विधानसभा निवडणुकीतही राहील अशा चर्चा ऐकण्यास मिळाल्या. एकीकडे असे असताना दुसरीकडे दक्षिण सोलापूर विधानसभा मतदारसंघाचे विद्यमान आमदार सुभाष देशमुख यांच्यासाठी पॉझिटिव्ह समीकरणे जुळून आल्याचे पाहायला मिळत आहे. त्यामुळे देशमुख हे महाविकास आघाडीतील बिघाडी पाहता लकी मानले जात आहेत.
दक्षिण विधानसभा मतदारसंघातून काँग्रेसच्या प्रणिती शिंदे यांना दहा हजाराचे मताधिक्य मिळाले. त्यामुळे विधानसभा निवडणुकीत काँग्रेसचा उमेदवार निश्चित विजयी होईल असे बोलले गेले. पण या मतदारसंघातून इच्छुक असलेले माजी आमदार दिलीप माने, दूध संघाचे संचालक सुरेश हसापुरे, माजी स्थायी समिती सभापती बाबा मिस्त्री, महादेव कोगनुरे हे प्रमुख नेते इच्छुक होते. त्यानंतर दक्षिणचे राजकारणात धर्मराज काडादी यांची एन्ट्री झाली. त्यामुळे सगळी समीकरणे बिघडली. या सर्व गोंधळात महाविकास आघाडी मधून उद्धव ठाकरे यांच्या शिवसेनेचे जिल्हाप्रमुख अमर पाटील यांना उमेदवारी देण्यात आली.
त्यामुळे तर दक्षिण मध्ये अधिकच गोंधळच उडाला. दिलीप माने यांची उमेदवारी जाहीर होऊन त्यांना ए बी फॉर्म दिला नाही. काडादी यांनाही उमेदवारी मिळाली नाही. त्यामुळे माने, काडादी, मिस्त्री, कोगनुरे यांनी बंडखोरी केली आहे.
2014 मध्ये झालेल्या विधानसभा निवडणुकीप्रमाणेच ही निवडणूक वाटत आहे. त्यावेळी सुभाष देशमुख हे 24 हजाराच्या मताधिक्याने विजयी झाले होते. आता ही बहुतांश तशीच परिस्थिती निर्माण झाली आहे. जर सुभाष देशमुख व दिलीप माने यांच्यात थेट लढत झाली असती तर निश्चित चित्र वेगळे दिसले असते.
भारतीय जनता पार्टीमध्ये ही बंडखोरी झाली आहे परंतु राजेश काळे, श्रीनिवास करली, हे आपल्या वॉर्ड पुरते मर्यादित नेते वाटतात असे बोलले जाते. श्रीशैल मामा हत्तूरे हे किती चालतील हा संशोधनाचा विषय आहे. ते उमेदवार म्हणून स्टॅन्ड राहणार का हे सुद्धा पहावे लागेल.
महाविकास आघाडीतील नेते एकमेकांच्या विरोधात लढले तर निश्चित सुभाष देशमुख वन साईड निघून जातील अशी चर्चा असून भारतीय जनता पार्टीचे मते आहे तशी राहतील पण महाविकास आघाडीतील मतांचे विभाजन निश्चित आहे.
