सोलापूर : मिनी आमदारकी समजली जाणाऱ्या जिल्हा नियोजन समितीच्या 20 नवीन सदस्यांच्या निवडी मंगळवारी करण्यात आल्या. राज्यात भारतीय जनता पक्ष व बाळासाहेब ठाकरे यांची शिवसेना गटाचे सरकार सत्तेत आल्यानंतर या निवडी करण्यात आल्या आहेत.
सोलापूर जिल्ह्याचे पालकमंत्री राधाकृष्ण विखे पाटील यांच्या अध्यक्षतेखाली जिल्हा नियोजन समितीची बैठक शुक्रवारी होत आहे. त्या पार्श्वभूमीवर या निवडी करण्यात आल्या. दक्षिण सोलापूर तालुक्यातील कुंभारी जिल्हा परिषद गटाचे माजी जिल्हा परिषद सदस्य तथा पक्षनेते अण्णाराव बाराचारे यांना पुन्हा एकदा जिल्हा नियोजन समितीवर सदस्य म्हणून संधी देण्यात आली आहे.
आमदार तथा माजी सहकार मंत्री सुभाष देशमुख यांचे ते कट्टर समर्थक आहेत. कुंभारी गाव हे अक्कलकोट विधानसभा मतदारसंघात असल्याने आमदार तथा भाजप जिल्हाध्यक्ष सचिन कल्याणशेट्टी यांच्या ही ते अतिशय जवळचे कार्यकर्ते समजले जातात. जिल्हा परिषद सदस्य असताना बाराचारे हे पाच वर्षे नियोजन समितीचे सदस्य होते.
आपल्या भागातील अनेक प्रश्न त्यांनी मांडले आहेत. पाणी पुरवठा, रस्ते, शेतकऱ्यांच्या विजेचा प्रश्न यावर आवाज उठविला आहे. त्यांच्या या निवडी बद्दल सर्व स्तरातून अभिनंदन होत असून जिल्हा नियोजन समिती वर जाणारे तेमागील टर्मचे ते एकमेव माजी जिल्हा परिषद सदस्य आहेत.
