सोलापूर : कोरोना महामारीच्या दोन वर्षानंतर सोलापुरात भरत असलेले इलेक्ट्रो प्रदर्शन यंदा विष्णू मिलच्या कंपाउंड मध्ये होत आहे. सोलापूर इलेक्ट्रॉनिक डीलर असोसिएशन अर्थात सेडा संघटनेच्या वतीने यंदा या प्रदर्शनाबाबत प्रचंड उत्साह आहे. विशेष म्हणजे सोलापूरकर सुद्धा या प्रदर्शनाची आतुरतेने वाट पाहत असतात.
दिवसेंदिवस इलेक्ट्रॉनिक जगतात नवनव्या वस्तू पाहायला मिळत आहेत. त्या एका छताखाली मिळत असल्याने खरेदी करण्याची सुवर्णसंधी नागरिकांना असते. त्यामुळे या प्रदर्शनाला सोलापुरात फार महत्व आहे. यापूर्वी हे प्रदर्शन होम मैदान, नार्थकोट मैदान, हरीभाई देवकरण प्रशाला मैदान तसेच जुळे सोलापुरातील हॉटेल अंबर समोरील मैदानावर भरले गेले होते यंदा मात्र संघटनेने ही जागा बदलली आहे.
मंगळवेढा रोडवर विष्णू मिल कंपाऊंडच्या खुल्या जागेत हे प्रदर्शन आयोजित करण्यात आले आहे. तसे पाहायला गेले तर सोलापूरकर हे रेल्वे ब्रिज सोडून पुढे जाण्यास पसंती देत नाहीत. याच भागात रिलायन्स मार्केट व वॉलमार्ट हे नागरिकांचा प्रतिसाद नसल्याने बंद पडल्याचे पाहायला मिळतात. त्यामुळे त्या भागात प्रतिसाद नसतो असे ऐकण्यास मिळते. सोलापूरकर विष्णू मिल कंपाऊंडच्या परिसराकडे जाण्यास अनुच्छूक असल्याची चर्चा आता ऐकण्यास मिळत आहे. म्हणूनच या प्रदर्शनाला तितका प्रतिसाद मिळणार नाही. त्यामुळे या प्रदर्शनामध्ये सहभागी झालेल्या स्टॉल धारकांचाही हिरमोड होईल अशी शक्यता वर्तवली जात आहे.
त्याचबरोबर सेडा संघटना यंदा प्रसिद्धी आणि मार्केटिंगमध्ये कमी पडत असल्याची चर्चा ऐकण्यास मिळाली सध्याचा जमाना सोशल मीडियाचा आहे, सोशल मीडियामध्ये अनेक बदल झाले आहेत. यंदाच्या प्रचार प्रसिद्धीचा खर्च हा सेडा संघटनेला न जपणारा असल्याची माहिती त्यांच्याच एका सदस्याकडून मिळाली त्यामुळे ही प्रतिसाद कमी मिळेल अशी शक्यता वर्तवली जात आहे.
