सोलापूर : मार्च अखेर जसा जसा जवळ येत आहे, तसतसा सोलापूर जिल्हा परिषदेमध्ये निधी खर्च करण्याबाबत आढावा बैठका घेऊन अधिकाऱ्यांना वारंवार सूचना देण्यात येत आहेत. कार्यकारी अधिकारी दिलीप स्वामी हे 41 दिवसाच्या प्रशासकीय प्रशिक्षणासाठी मसूरी या ठिकाणी गेले आहेत त्यांच्या पश्चात अतिरिक्त मुख्य कार्यकारी अधिकारी संदीप कोहिनकर यांच्याकडे सीईओ पदाचा पदभार देण्यात आला आहे.
मार्च एंड त्यातच डीपीसी निधी खर्चाचे आव्हान, बजेट तयार करण्याची पळापळ अशा परिस्थितीत कोहिनकर यांच्याकडे पदभार आलेला आहे. पुणे जिल्हा परिषद आणि अहमदनगर या मोठ्या जिल्हा परिषदेत काम करण्याचा दांडगा अनुभव असल्याने कोहीनकर हे आता त्याच ताकतीने जिल्हा परिषद सांभाळत आहेत.
जिल्हा परिषदेमध्ये सध्या 2023-24 चे बजेट तयार करण्याचे काम सुरू आहे. त्या पार्श्वभूमीवर मुख्य कार्यकारी अधिकारी कोहिनकर यांनी सेस फंडाच्या निधी खर्चाचा आढावा घेतला. कृषी विभागाच्या 50 टक्के वस्तू खरेदी झालेल्या असून त्यांना संपूर्ण खर्च करावा यासाठी सूचना करण्यात आल्या आहेत. पशुसंवर्धनच्या सेसचा निधी हा लंपी आजारावर खर्च झाल्याने त्या विभागाची कोणतीही खर्चाची अडचण नाही.
मात्र समाजकल्याणला सेसफंडातून मोठ्या प्रमाणात निधी दिला जातो तो अद्यापही खर्च झालेला नाही. याद्या तयार आहेत परंतु त्याची अजून लॉटरी नाही त्यामुळे समाज कल्याणची कोणतीही खरेदी झाल्याचे दिसून येत नाही. आढावा बैठकीत समाज कल्याणला सेस निधी खर्च करण्याची चांगली तंबी कोहिनकर यांनी दिली असल्याची माहिती आहे.
