सोलापूर ! पत्रिका वाटल्या, मंडप सजला, मात्र लग्न झालेच नाहीत ; काँग्रेस-राष्ट्रवादीच्या भांडणात भरडले सोलापूर प्रशासन ; काय आहे हा प्रकार?

कोरोना काळात जिल्हा प्रशासनाने सामान्य जनतेसह आपल्या अधिकारी, कर्मचारी आणि त्यांच्या कुटुंबाची काळजी घेतली आहे. रंगभवन येथे सोलापूर जिल्हा महसूल कर्मचारी कल्याण निधी संचलित या कोविड हॉस्पिटलमध्ये 50 ऑक्सिजनच्या बेडची सोय करण्यात आली आहे.

कोविड हॉस्पिटलमध्ये 50 बेडपैकी 16 बेड आयसीयूमधील राहणार आहेत. अधिकारी, कर्मचारी, त्यांचे कुटुंबीय यांच्यावर उपचार होणार आहेत. 10 बेड इतर नागरिकांना राखीव ठेवण्यात आले आहेत. कोविड हॉस्पिटलच्या कामासाठी सामाजिक संस्थांचा सीएसआर फंड आणि महसूल कर्मचारी संघटनेने निधी उभा केला आहे. यातूनच हॉस्पिटल उभे राहत असून याठिकाणी नाष्टा, जेवणाची सोय सामाजिक संस्था करणार आहेत. बेडची व्यवस्था आवादा ग्रुपचे विनित मित्तल यांनी केली तर मंडप, नाईट आणि फॅनची सोय श्रवंती मंडप आणि इलेक्ट्रीक डेकोरेटर्सचे पुरूषोत्तम सग्गम यांनी केली आहे,

याठिकाणी पाच डॉक्टर, 15 परिचारिका, 15 सफाई कर्मचारी यांची नेमणूक करण्यात आली आहे. सोलापूर जिल्हा महसूल कर्मचारी कल्याण निधीमधून कोविड हॉस्पिटलच्या औषधांचा खर्च करण्यात येणार आहे. या कल्याण निधीचे अध्यक्ष निवासी उपजिल्हाधिकारी भारत वाघमारे असून सचिव जिल्हा उपनिबंधक कुंदन भोळे आहेत. यात सर्वाधिक सहकार्य केलेले मित्तल ग्रुपचे आवादा फाउंडेशन हे सौरऊर्जा प्रकल्पाशी निगडित असल्याने त्यांच्या इच्छेनुसार हे उद्घाटन ऊर्जामंत्री नितीन राऊत यांच्या हस्ते करायचे होते त्याप्रमाणे या हॉस्पिटलचे शुक्रवार  28 मे 2021 रोजी सकाळी 11 वाजता ऊर्जामंत्री नितीन राऊत यांच्या हस्ते ऑनलाईन पद्धतीने उद्घाटन होणार असल्याचे  जिल्हाधिकारी मिलिंद शंभरकर यांनी सांगितले होते.

उद्घाटन समारंभाला पालकमंत्री दत्तात्रय भरणे, खासदार जयसिद्धेश्वर महास्वामी, महापौर श्रीकांचना यन्नम, आमदार सुभाष देशमुख, विजयकुमार देशमुख, आमदार प्रणिती शिंदे, मनपा आयुक्त पि. शिवशंकर, पोलीस आयुक्त अंकुश शिंदे, जिल्हा परिषदेचे मुख्य कार्यकारी अधिकारी दिलीप स्वामी, पोलीस अधीक्षक तेजस्वी सातपुते यांची उपस्थिती होती, मात्र राज्यात सध्या मागासवर्गीय आरक्षण पदोन्नतीचा वाद महाविकास आघाडीच्या सरकार मध्ये सुरू आहे, काँग्रेस या विषयी आक्रमक असून ऊर्जामंत्री नितीन राऊत यांनी सरकारच्या भूमिकेला तीव्र विरोध केला आहे, या विषयात काँग्रेस सरकार मधून बाहेर पडण्याची शक्यता निर्माण झाली आहे, अशातच गुरुवारच्या मंत्रिमंडळ बैठकीत उपमुख्यमंत्री अजित पवार व ऊर्जामंत्री नितीन राऊत यांच्यात खडाजंगी झाल्याची चर्चा आहे, त्याचे पडसाद सोलापूर कोविड हॉस्पिटल उद्घाटन कार्यक्रमावर उमटले, ऊर्जामंत्री राऊत यांनी ऑनलाइन उद्घाटन केलेच नाही, त्यामुळे पालकमंत्री दत्तात्रय भरणे यांनी ही यात जास्त इंटरेस्ट दाखवला नसल्याची चर्चा आहे.