सोलापूर : भारतीय जनता पक्ष सध्या सर्वत्र बदलाच्या भूमिकेत दिसतो, गुजरातच्या निवडणुकीत ते चित्र दिसले. सोलापुरात सुद्धा आमदार श्रीकांत भारतीय यांनी दौरा करत पर्याय शोधण्याचा प्रयत्न केला आहे. भाजपचा बालेकिल्ला असलेल्या ‘शहर उत्तर’ मध्ये राजकारण वेगळ्या वळणावर आहे. पक्षातीलच मालक विरोधकांची मूठ बांधतानाचे चित्र पहायला मिळते.
भारतीय जनता पार्टीचे निष्ठावंत कार्यकर्ते विरभद्रेश बसवंती यांच्या द्वितीय पुण्यस्मरण कार्यक्रमाच्या निमित्ताने भारतीय जनता पार्टीचे सर्व जुने नेते व कार्यकर्ते एकत्र आले. कार्यक्रमाच्या पत्रकार परिषदेच्या निमित्ताने एकेकाळी विजयकुमार देशमुख यांची राजकिय यंत्रणा हाताळणारे माजी शहर अध्यक्ष अशोक निंबर्गी व माजी सभागृह नेते तथा भाजपमधील ‘शहर उत्तर’च्या राजकारणात कायम चर्चेचा विषय असलेले सुरेश पाटील हे दोघे एकत्र दिसले. या दोघांचे विषबाधा प्रकरणामुळे जमत नव्हते मात्र दोघेही एका व्यासपीठावर आले माध्यमांनी छेडल्यावर सुरेश पाटील यांनी झाले गेले गंगेला मिळालं म्हणत वादावर पडदा टाकत पुन्हा जुन्या मैत्रीला नवीन उजाळा दिल्याचे दिसून आले.
सोमवारी झालेल्या कार्यक्रमास प्रचंड प्रतिसाद मिळाला. हुतात्मा स्मृती मंदिर खचाखच भरून, पुन्हा बाहेर खुर्च्या आयोजकांना टाकाव्या लागल्या. 8 दिवस सर्व मित्र परिवाराने घेतलेले परिश्रम प्रत्येकांना व्यक्तिगत भेटून केलेला संपर्क याचे चीज झाले. सध्या भारतीय जनता पार्टी मध्ये जुन्या कार्यकर्त्यांमध्ये असलेली नाराजी लक्षात घेता या सर्व जुन्या कार्यकर्त्यांना घेऊन पुन्हा नव्याने मोट बांधण्याची तयारी आता भाजपमधील ही सर्व नेते मंडळीत करत असल्याचे चित्र आहे.
या कार्यक्रमाच्या निमित्ताने शहर उत्तर मधील सर्व कार्यकर्त्यांच्या घरी निमंत्रण देण्याच्या निमित्ताने माजी शहर अध्यक्ष अशोक निंबर्गी, सुरेश पाटील, हेमंत पिंगळे, अशोक खटके, चन्नवीर चिट्टे या सर्व जुन्या मित्रांच्या एकत्रित येण्याने शहर उत्तरच्या राजकारणाला नवीन दिशा मिळणार असल्याची चर्चा सध्या जोरात सुरु आहे.
