सोलापूर : राज्याचे सार्वजनिक आरोग्य मंत्री तानाजी सावंत यांनी हिवाळी अधिवेशनामध्ये सोलापूर जिल्हा परिषदेचे जिल्हा आरोग्य अधिकारी डॉक्टर शितलकुमार जाधव यांना तडकाफडकी निलंबित करण्याची घोषणा केली. त्यानंतर जिल्हा परिषदेमध्ये एकच खळबळ उडाली.
या निलंबनामागील खरे सत्य बाहेर आलेले नाही. मात्र या प्रकरणानंतर जिल्हाप्रमुख मनीष काळजे यांच्यावर नवनिर्मित नर्सेस संघटनेच्या वतीने आरोग्य अधिकारी व कर्मचाऱ्यांवर काळजे हे दबाव आणत असल्याचा थेट आरोप करण्यात आला. काळजे यांनी आपले स्पष्टीकरण माध्यमांसमोर दिले आहे मात्र जिल्हा आरोग्य अधिकारी यांच्या निलंबनानंतर मुख्यमंत्री शिंदे गटाच्या पदाधिकाऱ्यांचा जिल्हा परिषदेमध्ये रुबाब आणखीच वाढण्याचे पाहायला मिळत आहे.
याच पार्श्वभूमीवर शिवसेनेचे संपर्कप्रमुख प्राध्यापक शिवाजी सावंत हे आपल्या समर्थकांसह नुकतेच जिल्हा परिषदेमध्ये येऊन गेले. जेव्हा ते जिल्हा परिषदेमधून बाहेर पडत असताना पत्रकारांनी त्यांना गाठले जिल्हा परिषदेत येण्याचे कारण विचारले असता अतिरिक्त मुख्य कार्यकारी अधिकारी संदीप कोहिनकर यांच्या दालनामध्ये त्यांनी विविध अधिकाऱ्यांना बोलवून बैठक घेतल्याची माहिती मिळाली.
जिल्हा नियोजन समिती च्या माध्यमातून मिळणाऱ्या निधीबाबत त्यांनी अधिकाऱ्यांसोबत चर्चा केली. आता आम्ही सत्तेत आहोत आजपर्यंत इतर लोकसत्तेत होते परंतु आता आम्हाला विसरू नये असा सल्ला त्यांनी अधिकाऱ्यांना दिल्याचे समजले.
जिल्हा नियोजन समितीच्या निधीमधून पालकमंत्र्यांच्या कोट्यामधून मुख्यमंत्री शिंदे गटाने विशेष करून माढा आणि करमाळा तालुक्यातील विविध विकास कामासाठी मोठ्या प्रमाणात निधीची मागणी केली आहे यावरून पालकमंत्र्यांच्या कोट्याची यादी अद्यापही फायनल होत नसल्याची माहिती समोर आली आहे.
