सोलापूर : राष्ट्रवादी काँग्रेसमध्ये आता थेट शरद पवार आणि अजित पवार असे दोन गट झाले आहेत. शरद पवार यांच्या गटातील जिल्हाध्यक्ष आणि शहराध्यक्ष हे दोन्ही नेते मोठ्या साहेबांकडेच आहेत त्यामुळे आता अजित पवार गटातील शहराध्यक्ष आणि जिल्हाध्यक्ष पदाच्या निवडी केल्या जाणार आहेत.
नुकतेच मुंबईमध्ये जिल्हाध्यक्ष आणि शहराध्यक्ष पदासाठी इच्छुकानी मुलाखती दिल्या. यामध्ये शहराध्यक्षपदासाठी प्रदेशवर काम करणारे संतोष पवार, महानगरपालिकेचे माजी गटनेते किसन जाधव आणि विद्यमान युवक अध्यक्ष जुबेर बागवान यांचा समावेश होता तर जिल्हाध्यक्ष पदासाठी प्रदेश प्रवक्ते उमेश पाटील, माजी आमदार दीपक साळुंखे आणि कल्याणराव काळे या तिघांनी इच्छा व्यक्त केली आहे.
जिल्हाध्यक्ष पदासाठी इच्छुक असणारे तीनही नेते हे मराठा समाजातील आहेत परंतु त्या उलट सोलापूर शहरांमध्ये मराठा, भटक्या विमुक्त आणि अल्पसंख्यांक अशा तीन प्रवर्गातील नेत्यांनी शहराध्यक्ष पदासाठी इच्छा व्यक्त केली.
सूत्रांकडून मिळालेल्या माहितीनुसार जिल्हाध्यक्ष पदासाठी सुद्धा वेगवेगळ्या प्रवर्गातून कार्यकर्ते पुढे येण्याचे अपेक्षा अजित पवारांना होती. अध्यक्ष पदासाठी मुलाखत दिल्यानंतर बागवान यांनी संतोष पवार यांना शहराध्यक्ष करावे, आपण कार्याध्यक्षपदावर काम करण्यास तयार आहोत, किसन जाधव यांच्यावर पूर्ण वेळ महापालिका निवडणुकीची जबाबदारी द्यावी अशी इच्छा व्यक्त केली त्यानंतर किसन जाधव यांनी महानगरपालिकेचा मला अनुभव आहे. येणारी महापालिका निवडणूक शहराध्यक्ष म्हणून माझ्या नेतृत्वाखाली व्हावी अशी अपेक्षा पक्षश्रेष्ठसमोर उपस्थित केले आहे.
दरम्यान अजित पवार यांनी संतोष पवार आणि किसन जाधव या दोघांनी मिळून चर्चा करून निर्णय घ्यावा अशा सूचना केल्या होत्या परंतु दोघेही इच्छुक असल्याने तोडगा निघू शकला नाही. शहराध्यक्ष आणि जिल्हाध्यक्ष पदाच्या मुलाखती होऊन पंधरा दिवस होऊन गेले आहेत अजूनही वरिष्ठांकडून निवडी जाहीर करण्यात आल्या नाहीत.
जिल्ह्यामध्ये पुन्हा एकदा दीपक साळुंखे यांना संधी दिली जाण्याची शक्यता आहे, तर पडत्या काळात सोलापुरात राष्ट्रवादी काँग्रेसच्या सोबत खंबीर राहिलेले, पक्ष वाढीसाठी प्रयत्न करणारे संतोष पवार यांच्या नावावर शिक्कामोर्तब होण्याची शक्यता असून महापालिकेची जबाबदारी किसन जाधव यांच्या खांद्यावर दिली जाऊ शकते.