खेकडा मसाला, मच्छी फ्राय आणि बरंच काही गावरान ; मिसेस सीईओ, मातोश्री जंगम यांनीही केली रुक्मिणी महोत्सवात खरेदी
सोलापूर : मसालेदार खेकडा, गरमागरम भाकरी, मच्छी फ्राय, गावरान धपाटे, ठेचा, विविध चटण्या, कुरुड्या, पापड्या आणखी बरीच काही मेजवानी सोलापूरकरांना रुक्मिणी महोत्सवात मिळणार आहे तो रुक्मिणी महोत्सव आज गुरुवारपासून रंगभवन चौक परिसरातील वोरोनोको प्रशालेत सुरू झाला आहे. जिल्हा परिषदेचे मुख्य कार्यकारी अधिकारी कुलदीप जंगम यांच्या मातोश्री आणि त्यांच्या पत्नी या दोघींनीही या महोत्सवात सहभाग नोंदवत खरेदी करून बचत गटांच्या महिलांचा उत्साह वाढवला.
महिला या चूल व मूल या संकल्पनेतून बाहेर काढण्यासाठी उमेद अभियान यांचा मोठा सहभाग असल्याचे सांगताना उमेदने महिलांच्या उत्पादनासाठी, त्यांनी तयार केलेल्या वस्तूंना मार्केट उपलब्ध होण्यासाठी प्रयत्न करावा असे आवाहन खासदार प्रणिती शिंदे यांनी केले.
ग्रामविकास विभाग, महाराष्ट्र शासन, जिल्हा परिषद सोलापूर व महाराष्ट्र राज्य ग्रामीण जीवनोन्नती अभियान सोलापूर यांच्या वतीने आयोजित करण्यात आलेल्या मिनी सरस व रूक्मिणी महोत्सवचे उद्घाटन प्रसंगी त्या बोलत होत्या.
यावेळी आमदार सुभाष बापू देशमुख, जिल्हा परिषदेचे मुख्य कार्यकारी अधिकारी कुलदीप जंगम, प्रकल्प संचालक डॉ. सुधीर ठोंबरे, आरोग्य अधिकारी डॉ. संतोष नवले, उत्तर पंचायत समितीचे गटविकास अधिकारी बाबासाहेब पाटील, उमेदचे जिल्हा अभियान व्यवस्थापक सचिन चवरे, माविमचे सोमनाथ लामगुंडे इ उपस्थित होते.
यावेळी बोलताना आमदार सुभाष बापू देशमुख म्हणाले की, सोलापूर मध्ये उमेदच्या माध्यमातून महिलांनी तयार केलेल्या वस्तूंना बाजारपेठ मिळण्यासाठी सोलापूर बरोबरच पुणे, मुंबई येथेही प्रदर्शन भरविण्यात यावे त्यासाठी सर्व मदत करण्याची तयारी असल्याचे सांगत सोलापूरकरांनी लाभ घ्यावा असे आवाहन केले.
यावेळी प्रास्ताविक करताना जिल्हा परिषदेचे मुख्य कार्यकारी अधिकारी कुलदीप जंगम म्हणाले, उमेदच्या माध्यमातून महिलांना लखपती करण्यासाठी व त्यांचे उद्दोग व्यवसाय उभारण्यासाठी त्यांना वैयक्तिक कर्ज देण्याचे नियोजन करण्यात आले आहे.
प्रदर्शनात विविध प्रकारच्या नाविन्यपूर्ण वस्तूंचे 75स्टॉल लावण्यात आले आहेत. सदर प्रदर्शनामध्ये पंचगव्य उत्पादने, लाकडी तेलघाण्यावरील तेल, लाकडी खेळणी, मसाले, मिलेट कुकीज, तृणधान्य चिवडा इआदी उत्पादनांचा समावेश आहे.
सदर कार्यक्रमाच्या वेळी उमेद अभियान मधील काही यशस्वी महिलांच्या यशोगाथा पुस्तिकेचे प्रकाशनही करण्यात आले. सदर कार्यक्रमाचे सूत्रसंचालन वेदपाठक यांनी तर आभार प्रदर्शन प्रकल्प संचालक डॉ. सुधीर ठोंबरे यांनी केले.
सदर महोत्सव यशस्वी करण्यासाठी जिल्हा अभियान व्यवस्थापक सचिन चवरे, लेखाधिकारी शुभांगी देशपांडे,जिल्हा व्यवस्थापक संतोष डोंबे, राहुल जाधव, दयानंद सरवळे, मीनाक्षी मडवळी, अनिता माने, अमोल गलांडे, शीतल म्हांता, सर्व तालुका अभियान व्यवस्थापक, तालुका व्यवस्थापक व प्रभाग समन्वयक परिश्रम घेत आहेत.
