“लाखो रुपयांचा निधी खर्च करून मोदी मुस्लिम कब्रिस्थानाचा नगरसेविका श्रीदेवी फुलारे यांनी केलेला विकास मुस्लिम समाज कधीच विसरणार नाही कायमच आम्ही त्यांच्या पाठीशी आहोत असे गौरवोद्गार शहर काझी सय्यद अमजद अली यांनी काढले”.
सोलापूर : सोलापूर नगरी ही सर्वधर्मसमभाव समभावाची म्हणून ओळखली जाते. मराठी,कन्नड आणि तेलगू भाषेचा संगम असलेले सोलापूर. अनेक सण, उत्सव,जयंती तितक्याच जल्लोषात साजरे होणारे सोलापूर. याच सोलापुरात फुलारे हे सर्वधर्मसमभाव जपणारे कुटुंब. घरात ख्रिश्चन व चर्मकार समाजाचा संगम. परंतू, मुस्लिम समाजाचा अतिशय महत्वाचा प्रश्न फुलारे दाम्पत्याने सोडवला. काँग्रेस नेते सुशीलकुमार शिंदे हे कायम आपल्या भाषणात सर्वधर्मसमभावाचे उदाहरण देतात, त्यांच्या या शब्दाला त्यांच्याच पक्षाच्या नगरसेविका श्रीदेवी जॉन फुलारे यांनी आपल्या कृतीतून सार्थ ठरवले.
सोलापूर शहरात मुस्लिम समाजाला काँग्रेस पक्षाकडून महापौर पद,स्थायी समिती सभापती पद, सभागृह नेते पद मिळालं आहे, राष्ट्रवादी काँग्रेस कडून उपमहापौर पद,स्थायी समिती सभापती पद सुद्धा मिळालं आहे. या भागात मुस्लिम समाजाच्या मतांवर अनेक जण आमदार खासदार झाले, अनेक जण मोठे नेते झाले परंतु या एकालाही जे जमलं नाही ते एका चर्मकार समाजाच्या नगरसेविकेने सोलापुरात करून दाखवले.
शहराच्या मध्यवर्ती भागात मुस्लिम समाजाचे मोदी कब्रस्थान आहे. शहरात सर्वात जुने आणि मोठे कब्रस्थान असल्याने त्याची दुरवस्था झाली होती. या भागात नगरसेविका श्रीदेवी फुलारे या 10 वर्षांपासून काम करतात.
ही दुरवस्था त्यांना पहावली नाही. मागील दोन ते तीन वर्षांपासून त्यांचा मुस्लिम स्मशानभूमी सुधारण्यासाठी प्रयत्न सुरू होता. आपल्या भांडवली निधीतून तब्बल 86 लाखाचा निधी त्यांनी या सुशोभीकरण कामासाठी दिला.
आज स्मशानभूमीचे चित्र पाहिले तर कुणालाही विश्वास बसणार नाही इतके सुंदर आणि देखणे काम याठिकाणी करण्यात आले आहे. त्यामुळे स्मशानभूमीचा कायापालट झाला आहे. स्वतः सामाजिक कार्यकर्ते जॉन फुलारे यांनी समोर थांबून काम करून घेतलंय. 26 जानेवारी प्रजासत्ताक दिनाचं औचित्य साधून या कामाचा लोकार्पण सोहळा मोठ्या उत्साहात पार पडला.
नेमके याठिकाणी काय काम झाले..
भव्य प्रवेशद्वार.., पिण्याच्या पाण्यासाठी आर ओ प्लांट…, परिसरात पेव्हर ब्लॉक…,अंतर्गत रस्त्यांची सुधारणा…, एल ई डी लाईटच्या माध्यमातून सर्वत्र प्रकाश…., अंत्यविधी साठी येणाऱ्या लोकांना हात पाय धुण्यासाठी पाण्याची सुविधा……., नमाज पठणाच्या ठिकाणी रंगरंगोटी……… असे आमूलाग्र बदल झाले आहेत.
जॉन फुलारे यांनी लहानपणीची आठवण सांगताना, मी आईसोबत ख्रिश्चन स्मशानभूमीत राहायला होतो. खिश्चन स्मशानभूमी आणि मुस्लीम कब्रस्तानात खड्ढे खोदण्याचे काम करायचो. हे काम करताना एक रुपया दोन रुपया मिळायचे. कब्रस्तानच्या बाहेर अन्नदान व्हायचे. हे अन्न खाऊन दिवस काढले. लोकांचे दुःख मी जवळून पाहिले, येथील समस्याही माहिती होत्या. आता मी आणि पत्नीने मिळून कब्रस्तानचे सुशोभीकरण केल्याचे समाधान आहे.
