सोलापूर : सोलापूर जिल्हा परिषद पशुसंवर्धन विभाग अंतर्गत असलेल्या विजापूर रोडवरील नेहरूनगर इथल्या अंडी उबवणी केंद्रात मागील अनेक वर्षापासून सेंद्रिय खत म्हणून ओळखल्या जाणाऱ्या कोंबडीखताचा हिशोब नसल्याची माहिती समोर आली.
वर्षानुवर्ष अंडी उबवणी केंद्रात एकाच ठिकाणी पशुसंवर्धन पर्यवेक्षक मंगेश टेकाळे आणि शिपाई विठ्ठल भोसले यांची नेमणूक होती. या दोघांचा संगनमताने बराच गोंधळ त्या अंडी उबवणी केंद्रात सुरू असल्याच्या तक्रारी वारंवार होत्या परंतु त्याची चौकशी कुणीही करत नव्हते त्यांना पाठीशी घालण्याचे काम जिल्हा परिषद पशुसंवर्धन विभागाने केले असल्याचे समोर आले आहे.
सिंहासन मध्ये कोंबडी खत घोटाळ्याच्या शक्यतेची बातमी प्रसिद्ध होताच मागील काही जुने कोंबडे(पूर्वी काम केलेले व निवृत्त अधिकारी) जिल्हा परिषदेमध्ये पळत आले आपलं तर नाव यामध्ये येणार नाही ना? आपली चौकशी होणार नाही ना? यासाठी दिवसभर त्यांची धडपड सुरू असल्याचे पाहायला मिळालं. यावरून निश्चितच अंडी उबवणी केंद्रांमध्ये काहीतरी घोळ असल्याचे चर्चा जिल्हा परिषदे मधून ऐकण्यास मिळाली.
या प्रकरणाची सखोल चौकशी झाल्यास अनेकांची नावे या समोर येण्याची शक्यता आहे . मंगेश टेकाळे यांचे प्रमोशन झाल्याने त्यांची चांगलीच अडचण झाली आहे. जोपर्यंत या प्रकरणाची सखोल चौकशी होत नाही तोपर्यंत त्यांना इथून कार्यमुक्त करू नये अशा मागणीने जोर धरला आहे. मुख्य कार्यकारी अधिकारी दिलीप स्वामी आता या प्रकरणात कोणता निर्णय घेतात याकडे पशुसंवर्धन विभागाच्या नजरा लागल्या आहेत.
