राष्ट्रवादीच्या मेळाव्यात उत्साह आणि पाठिंब्याचे दर्शन ; राजन पाटलांनी दिला सातपुते यांना हा विश्वास
लोकसभा निवडणुकीच्या पार्श्वभूमीवर माजी आमदार राजन पाटील यांच्या मार्गदर्शनाखाली मोहोळ तालुका राष्ट्रवादी काँग्रेस पार्टीचा ‘कार्यकर्ता संवाद मेळावा’ अत्यंत उत्साहात पार पडला.
देशाचे पंतप्रधान नरेंद्र मोदी यांना पुन्हा एकदा पंतप्रधान करण्यासाठी पूर्ण ताकदीने महायुतीच्या पाठीशी उभे असल्याचा विश्वास राजन पाटील यांनी या संवाद मेळाव्यात बोलताना व्यक्त केला. या मेळाव्याच्या माध्यमातून मोहोळ तालुक्यातील राष्ट्रवादी काँग्रेसच्या कार्यकर्त्यांचा उत्साह आणि पाठिंब्याचे दर्शन घडले. हे पाहून भाजप महायुतीचे उमेदवार राम सातपुते हे भारावून गेले.
महायुतीमधील सर्व पक्षांचे कार्यकर्ते, पदाधिकारी, समर्थक आणि सोलापूरची सर्व स्तरातील जनता यांचं हे प्रेम आणि आशीर्वाद यांना आगामी काळात प्रामाणिक कामाच्या माध्यमातून सार्थ ठरविण्यासाठी नेहमीच कटिबद्ध राहीन. मी सामान्य कुटुंबातून आलेला कार्यकर्ता आहे, तुम्ही टाकलेल्या विश्वासाला आणि मालकांनी दिलेल्या आशिर्वादाला कधीच तडा जाऊ देणार नाही, असा शब्द सातपुते यांनी यावेळी उपस्थितांना दिला.
याप्रसंगी आमदार तथा भाजपा जिल्हाध्यक्ष सचिन कल्याणशेट्टी, आमदार यशवंत माने, ज्येष्ठ नेते शहाजहान शेख, राष्ट्रवादीचे तालुकाध्यक्ष प्रकाश चवरे, भाजपा जिल्हा सरचिटणीस विकास वाघमारे, जिल्हा दूध संघाचे उपाध्यक्ष दीपक माळी, राष्ट्रवादीचे जिल्हा कार्याध्यक्ष अस्लम चौधरी, जिल्हा नियोजन समिती सदस्य सज्जन पाटील, भाजपा मोहोळ विधानसभा प्रमुख रमेश माने, प्रमोद डोके, रामदास चवरे, ज्योत्स्ना पाटील, सिंधू वाघमारे, जगू कोल्हाळ आदी पदाधिकारी, कार्यकर्ते व तालुक्यातील प्रमुख नेते मोठ्या संख्येने उपस्थित होते.
