दिलीप माने यांनी उत्तर आणि दक्षिणच्या कार्यकर्त्यांची बोलावली बैठक ; बुधवारी सायंकाळी भूमिका स्पष्ट करणार
सोलापूर : काँग्रेसचे माजी आमदार मात्र सध्या शांत राहणारे नेते दिलीप माने यांनी आगामी लोकसभा निवडणुकीच्या पार्श्वभूमीवर आपल्या उत्तर सोलापूर आणि दक्षिण सोलापूर तालुक्यातील कार्यकर्त्यांची अतिशय महत्त्वाची बैठक बुधवारी सकाळी आपल्या ब्रह्मदेवदादा माने इन्स्टिट्यूट बेलाटी या ठिकाणी बोलावली आहे.
सकाळी नऊ वाजता ही बैठक होणार असून दुपारी चार वाजता ते आपल्या सोलापूर शहरातील ब्रह्मदेवदादा माने बँकेच्या मुख्य कार्यालयात आपली भूमिका स्पष्ट करणार आहेत.
दिलीप माने 2009 च्या विधानसभा निवडणुकीत काँग्रेस पक्षाकडून दक्षिण मतदारसंघात आमदार म्हणून विजयी झाले. त्यानंतर ते 2014 मध्ये त्याच मतदारसंघात पराभूत झाले. 2019 मध्ये मात्र त्यांनी काँग्रेसला सोडून शिवसेनेचा धनुष्य हाती घेत सोलापूर शहर मध्य या मतदारसंघातून निवडणूक लढवली. त्या निवडणुकीमध्ये त्यांना अपयश आले. त्यानंतर तब्बल पाच वर्ष ते शांत आहेत. राज्याचे उपमुख्यमंत्री अजित पवार यांच्या ते कायम संपर्कात असतात. काही दिवसांपूर्वी अजित पवार यांच्या दौऱ्या वेळी त्यांनी आपल्या तिरे गावातील फार्म हाऊसवर अजित पवार यांच्यासाठी हुरडा पार्टीचे आयोजन केले होते.
दरम्यान आता लोकसभा निवडणूक सुरू आहे आणि दिलीप माने हे अजूनही उद्धव बाळासाहेब ठाकरे यांच्या गटातच आहेत. त्यांनी दुसऱ्या पक्षात प्रवेश केलेला नाही त्यातच काँग्रेस नेते सुशीलकुमार शिंदे यांच्यासोबत काही कार्यक्रमाला ते दिसून आले आहेत. मालकांनी पुन्हा दक्षिण विधानसभा मतदारसंघ डोळ्यासमोर ठेवून आपली मोर्चेबांधणी सुरू केल्याचे पाहायला मिळते.
आमदार प्रणिती शिंदे यांनी सोलापूर लोकसभा मतदारसंघासाठी आपला प्रचार यापूर्वी सुरू केला आहे. त्यामुळे येणाऱ्या लोकसभा निवडणुकीमध्ये आपण काय भूमिका घ्यायची यासाठी उत्तर सोलापूर आणि दक्षिण सोलापूर तालुक्यातील कार्यकर्त्यांची बैठक बुधवार दिनांक 20 मार्च रोजी आपल्या बेलाटी येथील ब्रह्मदेव दादा माने इन्स्टिट्यूट या ठिकाणी बोलावली आहे. सर्व कार्यकर्त्यांचे म्हणणे ऐकून घेतल्यानंतर दुपारी चार वाजता ते आपल्या सोलापूर शहरातील ब्रह्मदेव दादा मैने बँकेच्या मुख्य कार्यालयात आपली राजकीय भूमिका स्पष्ट करणार असल्याने त्यांच्या या बैठकीकडे सोलापूर जिल्ह्याचे लक्ष लागले आहे.