जातीच्या फॅक्टर मुळे यतीन शहाला धक्का ; निष्ठावंत कार्यकर्त्याचा पराभव बापूंच्या जिव्हारी
सोलापूर : सोलापूर कृषी उत्पन्न बाजार समितीच्या निवडणुकीत आमदार सचिन कल्याणशेट्टी, माजी आमदार दिलीप माने, दक्षिणचे नेते सुरेश हसापुरे यांच्या पॅनलने बाजी मारली परंतु या तिघांनाही या निवडणुकीत एक जोरदार धक्का बसला त्याची मात्र चर्चा झाली नाही.
तो धक्का म्हणजे दिलीप माने यांनी उभे केलेले शिवसेनेचे जिल्हाप्रमुख गणेश वानकर, कल्याणशेट्टी यांचे समर्थक रवी रोकडे आणि हसापुरे समर्थक संगमेश बगले पाटील यांचा झालेला पराभव.
बाजार समितीच्या निवडणुकीत ग्रामपंचायत मध्ये चार जागा निवडून द्यायच्या होत्या त्यामध्ये दोन सर्वसाधारण, एक अनुसूचित जाती आणि एक आर्थिक दुर्बल घटक. सुभाष देशमुख यांच्या पॅनल मधील सर्वसाधारण मध्ये मनीष देशमुख, रामप्पा चिवडशेट्टी हे दोघेही निवडून आले. अनुसूचित जाती मधून अतुल गायकवाड यांनी रवी रोकडे यांचा पराभव केला.
आर्थिक दुर्बल घटक या ग्रामपंचायतच्या मतदारसंघात काटे की टक्कर झाली या ठिकाणी आमदार सुभाष देशमुख यांचे अतिशय निष्ठावंत आणि कट्टर समर्थक मानले जाणारे यतीन शहा हे उमेदवार होते. त्यांचा केवळ 34 मतांनी पराभव झाला. त्या ठिकाणी सुनील कळके हे लिंगायत समाजाचे उमेदवार विजयी झाले. यतीन शहा हे जैन समाजातील असल्याने त्यांना जातीच्या फॅक्टरचा मोठा फटका बसल्याचे पाहायला मिळाले.
उत्तर तालुक्यातील यतीन शहा यांना चांगले मतदान झाले पण दक्षिण सोलापुरात ग्रामपंचायत सदस्यांमध्ये लिंगायत समाजाचे प्राबल्य आहे तसेच धनगर समाज सुद्धा लिंगायत समाजाशी जास्त प्रमाणात जोडला गेल्याने त्या मतांचा फटका शहा यांना बसल्याचे दिसून आले.
यतीन शहा यांचा पराभव निश्चितच आमदार देशमुख यांना धक्का होता. सुभाष देशमुख यांचा या निवडणुकीत सर्वाधिक जोर हा ग्रामपंचायतीवर राहिला. त्यांनी त्या पद्धतीने मोर्चे बांधणी सुद्धा केली होती परंतु लिंगायत व धनगर या समाजाचे प्राबल्य दक्षिण मध्ये जास्त असल्याने शहा यांना यांना फटका बसला पण निष्ठावंत आणि एकनिष्ठ असलेला कार्यकर्ता पराभूत झाल्याचे मनीष देशमुख यांच्यासह देशमुख यांनाही जिव्हारी लागल्याचे बोलले जात आहे. शहा यांना निश्चितच सुभाष देशमुख यापुढे चांगल्या पदावर संधी देतील अशी चर्चा ऐकण्यास मिळते.
