मनीष देशमुख यांचा पहिल्याच निवडणुकीत दमदार विजय ; राजकीय संस्कृतीचे दर्शन
सोलापूर : संपूर्ण राज्याचे लक्ष लागलेल्या सोलापूर कृषी उत्पन्न बाजार समितीची निवडणूक चांगलीच गाजली. ग्रामपंचायत मतदार संघात आमदार सुभाष देशमुख यांनी बाजी मारली पण सोसायटी मतदारसंघात आमदार सचिन कल्याणशेट्टी यांच्या पॅनलने जोरदार मुसंडी मारत विजय मिळवला.
या निवडणुकीत सर्वांचे लक्ष लागले होते ते म्हणजे आमदार सुभाष देशमुख यांचे चिरंजीव मनीष देशमुख यांच्याकडे. त्यांची सार्वजनिक पहिलीच निवडणूक होती आणि ही निवडणूक सुभाष देशमुख यांच्या प्रतिष्ठेची झाली होती. बापूंनी यासाठी अनेक मोठ्या राजकीय नेत्यांची हात मिळवणी केली. विशेष म्हणजे आमदार विजयकुमार देशमुख आणि बापूंचे मनोमिलन हे सर्वात मोठे वैशिष्ट्य या निवडणुकीचे ठरले.
मनीष भैया स्वतः निवडणुकीत उभे असल्याने युवा कार्यकर्त्यांनी सुद्धा अतिशय झोकून देत काम केले. त्यांची पहिलीच निवडणूक असल्याने भाजपच्या कार्यकर्त्यांनी गाफिल न राहता काम केल्याचे पाहायला मिळाले. रोहन देशमुख हे सुद्धा या निवडणुकीत सक्रिय दिसून आले.
निवडणुकीच्या मतमोजणी वेळी पहिलाच निकाल मनीष देशमुख यांच्या विजयाचा लागला अन् कार्यकर्त्यांमध्ये उत्साह संचारला. ग्रामपंचायत मतदारसंघातून मनीष देशमुख हे तब्बल 200 मतांच्या फरकाने विजयी झाले यामुळे शिवसेना जिल्हाप्रमुख गणेश वानकर यांचा पराभव झाला.
ग्रामपंचायतचा निकाल देशमुख पॅनलच्या बाजूने लागला परंतु सोसायटी मतदारसंघात त्यांची पिछेहाट झाली. सकाळी साडेआठ वाजता आलेले मनीष देशमुख दोन वाजेपर्यंत मतमोजणी केंद्रात थांबून होते. जेव्हा संपूर्ण निकाल स्पष्ट झाला तेव्हा ते निघाले. त्याच वेळी त्यांना ज्येष्ठ नेते सुरेश हसापुरे बसलेले दिसले ते थेट त्यांच्याजवळ गेले आणि त्यांच्या गळ्यात पडून त्यांनाही शुभेच्छा दिल्या. दुसरीकडे हसापुरे यांनीही पहिल्या निवडणुकीत विजय झाल्याबद्दल त्यांचे अभिनंदन केले. यावेळी राजकीय संस्कृतीचे दर्शन घडले.
बाहेर आल्यानंतर कार्यकर्ते मोठ्या प्रमाणात जमा झाले होते. जल्लोष साजरा करण्यात येत होता मात्र मनीष देशमुख यांनी केवळ हार घालून सत्कार घेतला. गुलालाची उधळण करू दिली नाही. आपण विजय झालो मात्र आपल्या सहकाऱ्यांचा पराभव झाल्याचे दुःख त्यांच्या चेहऱ्यावर दिसून आले त्यामुळे त्यांनी कार्यकर्त्यांना जल्लोष करण्यापासून थांबवले.
