सोलापूर : कोरोना लाटेत कामावर असताना मृत्यू झालेल्या कंत्राटी कर्मचाऱ्यांच्या कुटुंबीयांना 50 लाख शासकीय मदतीचा आदेश जिल्हा परिषदेचे मुख्य कार्यकारी अधिकारी दिलीप स्वामी यांच्या हस्ते देण्यात आला हा आदेश हातात पडतात आपल्या मुलाच्या आठवणीने त्यांच्या पित्याच्या डोळ्यात अश्रू तरळले.
माढा तालुक्यातील पालवन गावातील ग्रामपंचायत मध्ये काम करणारा डेटा एन्ट्री ऑपरेटर प्रशांत परमेश्वर ओहोळ यांचे कोरोना काळात निधन झाले होते. त्यावेळी शासनाने शासकीय कामकाज करताना कोरोनाने मयत झालेल्या कर्मचाऱ्यांच्या कुटुंबियांना 50 लाखाची शासकीय मदत देण्याची घोषणा केली होती. त्यानुसार ग्रामसेवक संघाचे राज्याध्यक्ष तात्यासाहेब पाटील यांनी शासकीय स्तरावर पाठपुरावा केला.
जिल्हा परिषदेचे मुख्य कार्यकारी अधिकारी दिलीप स्वामी, ग्रामपंचायत विभागाचे उपमुख्य कार्यकारी अधिकारी इशादीन शेळकंदे यांनी तातडीने हा प्रस्ताव शासनाकडे पाठवला. तो प्रस्ताव मंजूर झाला आहे आणि कोरोनात मयत झालेल्या कंत्राटी कर्मचाऱ्याच्या नातेवाईकांना शासकीय मदत मिळण्याची राज्यातील पहिलीच घटना सोलापुरात पहायला मिळाली.
शुक्रवारी स्वामी यांच्या दालनात कार्यकारी अधिकारी इशादीन शेळकंदे, तात्यासाहेब पाटील, रामभाऊ मिटकल, सरपंच प्रतिनिधी अतुल क्षीरसागर, तेजस ओहोळ, मयताची आशा ओहोळ, वडील परमेश्वर ओहोळ, परमेश्वर पाटील, जिल्हा व्यवस्थापक महावीर काळे, कंत्राटी कर्मचारी महासंघाचे सचिन जाधव यांच्या उपस्थितीत 50 लाखाच्या शासकीय आदेश देण्यात आला.
सीईओ स्वामी म्हणाले, कोविड काळामध्ये अधिकारी कर्मचाऱ्यांनी स्वतःचा जीव धोक्यात घालून काम केले होते, हे कामकाज करताना काही कर्मचाऱ्यांचे मृत्यू झाला त्यामध्ये सोलापूर जिल्ह्यातील कंत्राटी कर्मचाऱ्यांचाही समावेश होता मात्र कंत्राटी म्हणून आम्ही दुर्लक्ष न करता त्यांचाही प्रस्ताव शासनाकडे पाठवला होता तो मंजूर झाला असून जे कर्मचारी प्रामाणिकपणे काम करतात त्यांच्या पाठीशी जिल्हा परिषद सदैव तत्पर असल्याचे ते म्हणाले.
