शरद पवार व सुशीलकुमार शिंदे यांना माजी मंत्री लक्ष्मण ढोबळे यांचा खोचक टोला
सोलापूर : राज्यामध्ये लोकसभा निवडणुकीसाठी राष्ट्रवादी काँग्रेसचे राष्ट्रीय अध्यक्ष शरद पवार आपली कन्या खासदार सुप्रिया सुळे यांच्यासाठी तसेच माजी केंद्रीय गृहमंत्री सुशीलकुमार शिंदे हे आपली कन्या आमदार प्रणिती शिंदे यांच्यासाठी प्रयत्नाची पराकाष्टा करताना दिसत आहेत.
शरद पवार यांनी बारामती लोकसभा मतदारसंघातील सर्वच विरोधकांशी जुळवून घेण्याचा प्रयत्न केला आहे. त्याच पद्धतीने सुशीलकुमार शिंदे यांनीही सोलापूर लोकसभा मतदारसंघातील पूर्वाश्रमी काँग्रेसच्या नेत्यांच्या गाठीभेटी घेत आहेत.
याच पार्श्वभूमीवर राज्याचे माजी मंत्री, भाजपचे प्रवक्ते लक्ष्मणराव ढोबळे हे सोलापूर जिल्हा परिषदेमध्ये आले असता पत्रकारांनी त्यांच्याशी संवाद साधण्याचा प्रयत्न केला. परंतु ढोबळे हे बोलण्याच्या मनस्थितीत नव्हते. जेव्हा पत्रकारांनी सुशीलकुमार शिंदे हे आपल्या कन्येसाठी किती फिरत आहेत असा प्रश्न विचारला असता मात्र ढोबळे सर बोलून गेले.
ते म्हणाले, जन्मदाते म्हणून शरद पवार हे सुप्रिया सुळे यांच्यासाठी, सुशीलकुमार शिंदे हे प्रणिती शिंदेसाठी तर मी लक्ष्मण ढोबळे माझी मुलगी कोमल साळुंखे यांच्यासाठी राबतो, कष्ट घेतो परंतु आम्हाला आमच्यासाठी राबणाऱ्या कार्यकर्त्यांचे कष्ट दिसत नाही असा खोचक टोला त्यांनी पवार आणि शिंदे यांना हाणला.
