सोलापूर : पंचायत समिती दक्षिण सोलापूरचे वार्षिक आमसभा तालुक्याचे आमदार सुभाष देशमुख यांच्या अध्यक्षतेखाली सोमवारी संपन्न झाली.
सभेला प्रांताधिकारी मनीषा आव्हाळे, तहसीलदार अमोल कुंभार, तहसीलदार राजशेखर लिंबारे, गटविकास अधिकारी बाळासाहेब वाघ, माजी जिल्हा परिषद सदस्य अण्णाराव बाराचारे, माजी उपसभापती रामप्पा चिवडशेट्टी, काँग्रेसचे धनेश आचलारे यांच्यासह इतर अधिकारी उपस्थित होते.
दक्षिण सोलापूर तालुका हा दक्षिण विधानसभा मतदारसंघ व अक्कलकोट विधानसभा मतदारसंघात विभागला गेला आहे सोमवारी दक्षिण सोलापूर तालुक्याच्या आमसभेत अक्कलकोट तालुक्याचे आमदार सचिन कल्याणशेट्टी हे उपस्थित नव्हते मात्र सर्वाधिक प्रश्न हे त्यांच्या मतदार संघातील दक्षिण तालुक्याच्या उळे, कासेगाव, वडजी, बोरामणी, कुंभारी, कर्देहळ्ळी या गावांमधील विजेचे डीपीचे उपस्थित झाले, तेव्हा काही ग्रामस्थांनी या सभेला आमदार सचिन कल्याणशेट्टी का उपस्थित नाहीत असा प्रश्न केला. तेव्हा आमदार सुभाष देशमुख यांनी अक्कलकोट आणि दुधनी बाजार समितीची निवडणूक लागल्याने आणि अर्ज भरण्याचा आज शेवटचा दिवस असल्याने कल्याणशेट्टी हे उशिरा येणार आहेत असे सांगितले.
तीन टाइम लाईट जाते ती रद्द करून दोन टाइम करावी, खरीप कांदा पीक पेरा अट काढून टाकावी, युरिया मिळत नाही, वडजी उळे कासेगाव भागात कायम लाईट जाते, लोडशेडिंगमुळे अडचण होते, डीपी उडतो, 24 तासात 8 तास लाईट मिळते, डीपीची अडचण मोठी आहे, लाईटच्या वेळेतच डीपीचे काम कसे काढता, दोन तास का वाढवून देत नाही अशा अनेक तक्रारी पुढे आल्या.
