सोलापूर : दरवर्षी ७ एप्रिल हा दिवस जागतिक आरोग्य दिन म्हणून साजरा केला जातो. सार्वजनिक आरोग्य विभाग या दिनानिमित्त यावर्षी राज्यातील सर्व सरकारी आरोग्य केंद्रांमध्ये स्वच्छता मोहीम राबविणार आहे. आरोग्यमंत्री डॉ. तानाजी सावंत यांच्या संकल्पनेतून जनमानसात आरोग्य सेवा अधिक सुंदर व स्वच्छ लोकाभिमुख करण्यासाठी ७ ते १४ एप्रिलदरम्यान “सुंदर माझा दवाखाना” हा उपक्रम राबविण्यात येणार असल्याची माहिती जिल्हा आरोग्य अधिकारी डॉ. सोनिया बागडे यांनी दिली.
जागतिक आरोग्य दिनाचे घोषवाक्य संपूर्ण जगभरात समान आरोग्य सेवा संविधांबद़दल जागरुकता पसरवणे आणि आरोग्याशी निगडित सर्व गैरसमज दूर करणे हा आहे. यासोबतच विविध आरोगयविषयक धोरण तयार करण्यास आणि त्यांची योग्य अंमलबजावणी करण्यास प्रवृत्त केले जाते. दरवर्षी यासाठी एक थीम निश्चित केली जाते. यंदाच्या आरोग्य दिनाची थीम सर्वांसाठी समान आरोग्य सुविधा,सर्वांसाठी आरोग्य असल्याची माहिती डॉ. सोनिया बागडे यांनी दिली. सरकारी रुग्णालये आणि आरोग्य संस्थेत सर्वांना समान सुविधा उपलब्ध आहेत आणि जास्तीत जास्त लोकांनी सार्वजनिक रुग्णालयांच्या सुविधांचा वापर केला पाहिजे. याविषयी जनजागृती निर्माण करण्यासाठी सार्वजनिक आरोग्य विभागातर्फे जागतिक आरोग्य दिनानिमित्त “सुंदर माझा दवाखाना” हा उपक्रम राबविण्यात येणार आहे.
सध्या आरोग्य संस्थांमध्ये दर महिन्याच्या पहिल्या शनिवारी स्वच्छता दिवस पाळला जातो. हा स्वच्छता दिवस नियमित राबवायचा असून स्वच्छता दिनाचा कार्यक्रम अधिक प्रभावीपणे राबविण्याच्या सुचना आरोग्यमंत्री यांनी दिल्या आहेत. त्यानुसार आरोग्य विभागाचे आयुक्त धीरज कुमार यांनी सर्व जिल्हयांना पत्राद्वारे “सुंदर माझा दवाखाना” हा उपक्रम राबतिवण्याविषयी सुचना केल्या आहेत.
या उपक्रमांतर्गत राज्यातील सर्व आरोग्य संस्थांमध्ये ७ ते १४ एप्रिल २०२३ या कालावधीत “सुंदर माझा दवाखाना” हा उपक्रम जिल्हा परिषदेचे मुख्य कार्यकारी अधिकारी दिलीप स्वामी यांच्या मार्गदर्शनाखाली राबविण्यात येणार आहे. या उपक्रमात आरोग्य संस्था व सभोवतालचा परिसर, सर्व वॉर्ड विभाग, स्व्च्छतागृहे, भांडारगृहे इत्यादींची स्वच्छता करण्यात यावी, तसेच आरोग्य संस्थांच्या आवारात व दर्शनी भागात सुशोभिकरण, रंगरंगोटी आणि आरोग्य संस्थेमार्फत जनतेला देण्यात येणाऱ्या सेवांचे फलक लावण्यात यावेत, अशा सुचना जिल्हा आरोग्य अधिकारी डॉ. सोनिया बागडे यांनी दिल्या.
