सोलापूर : शहरात रमजान महिन्याचा उत्साह असून राजकीय नेते रोजा इफ्तार पार्टीचे आयोजन करत आहेत. काँग्रेसचे माजी नगरसेवक तौफिक हतुरे यांनी शनिवारी आपल्या निवासस्थानाजवळ रोजा इफ्तार पार्टीचे आयोजन केले होते या इफ्तार पार्टीचे वैशिष्ठ्य ठरले ते म्हणजे सर्व धर्मातील धर्मगुरूंची उपस्थिती.
लिंगायत, बौद्ध, मुस्लिम, ख्रिश्चन, शीख या समाजातील धर्मगुरूंची यावेळी उपस्थीती होती. या इफ्तार पार्टीत महाविकास आघाडीच्या नेत्यांची मांदियाळी दिसून आली.
यावेळी काँग्रेस पक्षाचे शहराध्यक्ष चेतन नरोटे, जिल्हाध्यक्ष धवलसिंह मोहिते पाटील, दक्षिण तालुक्याचे नेते सुरेश हसापुरे, शिवसेनेचे जिल्हाप्रमुख गणेश वानकर, माजी गटनेते आनंद चंदनशिवे, माजी महापौर संजय हेमगट्टी, राष्ट्रवादी काँग्रेसचे नेते सुधीर खरटमल, माजी नगरसेवक रियाज हुंडेकरी, माजी महापौर सुशीला आबुटे, महिला अध्यक्ष हेमा चिंचोळकर, माजी महापौर आरिफ शेख, माजी नगरसेवक विनोद भोसले, विजयकुमार हत्तूरे, सुधीर लांडे, माजी नगरसेवक बाबा मिस्त्री, मन्सूर गांधी, वाहिद बिजापुरे, मकबुल मोहोळकर, देवेंद्र भंडारे, फारूक मटके, शौकत पठाण, ऍड संतोष होसमनी, शकील मौलवी यांच्यासह विविध क्षेत्रातील मान्यवर मोठ्या संख्येने उपस्थित होते.
धवलसिंह मोहिते पाटील हे जेव्हा तिथे आले तेव्हा त्यांना खुर्ची देणार कोण? असा प्रश्न होता. त्यांना पाहून हसापूरे यांच्या शेजारी बसलेले विनोद भोसले उठले, त्यांनी खुर्ची दिली, त्यावर मोहिते पाटील बसले, ते फारच कोपऱ्यात बसलेले पाहून शिवसेनेचे वानकर उठले त्यांनी मोहिते पाटलांना खुर्ची देत आपले मित्र हसापुरेंसोबत बसणे पसंद केले. तितक्यात सुधीर खरटमल यांचे आगमन झाले, ते चेतन नरोटे यांच्या शेजारी कोपऱ्यात बसले.
याच वेळी 2019 सालच्या विधानसभा निवडणुकीत दक्षिण मतदार संघात काँग्रेसकडून उभारलेल्या बाबा मिस्त्री यांचे आगमन झाले. तेव्हा त्यांना मोहोळकर यांनी या भावी आमदार म्हणून संबोधले या कार्यक्रमात अनेक भावी आमदारांची उपस्थिती मात्र दिसून आली.
