महेश कोठे अजित पवार गटात येणार ; उमेश पाटलांचे सूतोवाच ; भारत जाधवांना वयाचे निकष, काका साठे यांना का नाहीत?

महेश कोठे अजित पवार गटात येणार ; उमेश पाटलांचे सूतोवाच ; भारत जाधवांना वयाचे निकष काका साठे यांना का नाहीत

सोलापूर : माजी महापौर महेश कोठे यांचा अजूनही शरद पवारांच्या राष्ट्रवादी काँग्रेसमध्ये अधिकृत प्रवेश झालेला नाही. त्यांना सांगण्यावरून जरी काही कार्यकर्ते आमच्या राष्ट्रवादीत आले असले तरी भविष्यात कोठे हे आमच्याकडेच येतील असे सूतोवाच राष्ट्रवादी काँग्रेसचे मुख्य प्रवक्ते उमेश पाटील यांनी केले.

राष्ट्रवादी अजित पवार गटाचे मुख्य प्रवक्ते उमेश पाटील यांनी शहराच्या कार्यालयात पत्रकार परिषद घेतली. यावेळी त्यांनी विविध विषयांना हात घातला. शरद पवार गटाचे शहराध्यक्ष भारत जाधव यांना वयाचा निकष लावून राजीनामा देण्यास भाग पाडले यावर प्रतिक्रिया विचारले असता भारत जाधव यांना वयाचे निकष लावण्यात आले आहेत उलट भारत जाधव हे राष्ट्रवादीचे जिल्हाध्यक्ष काका साठे यांच्या पेक्षा कमी वयाने लहान आहेत. हेच निकष काका साठे यांना का नाहीत असा प्रश्न पाटील यांनी उपस्थित केला.

महापालिकेत एक हाती सत्ता द्या
सोलापुरात हद्दवाढ झाल्यापासून भागातील विकासाचे प्रश्न प्रलंबित आहेत. बाळे, नई जिंदगी, एमआयडीसी, मजरेवाडी या भागाचा विकास झालेला नाही, आजही त्या भागाची ग्रामपंचायत सारखी अवस्था आहे. एक सक्षम पार्टी म्हणून राष्ट्रवादी पुढे येत आहे. विकासाचे व्हिजन असणाऱ्या नेतृत्वाकडे येणाऱ्या महानगरपालिकेच्या निवडणुकीत सत्ता द्या, त्या पाच वर्षात विकासाचा संपूर्ण अनुशेष भरून काढला जाईल असा शब्द अजित पवारांचा समजा असे आवाहन सोलापूरकरांना केले.