सोलापूर : जिल्हा परिषदेच्या स्वच्छता दिंडी समारोपाचा कार्यक्रम जरी तब्बल पाच तास लांबला असला तरी रात्री सव्वा अकराला सुरू झालेल्या या कार्यक्रमाचे नियोजन जिल्हा परिषदेने अत्यंत चांगल्या प्रकारे केले होते.
मुख्यमंत्री एकनाथ शिंदे यांचा वारकरी पांढरा फेटा आणि तुळशीचा हार घालून भव्य स्वागत करण्यात आले. याचबरोबर उपस्थित सर्व मंत्री आणि आमदारांचे सुद्धा हा वारकरी फेटा घालूनच सत्कार करण्यात आला.
राज्याचे ग्रामविकास मंत्री गिरीश महाजन यांचा सत्कार अतिरिक्त मुख्य कार्यकारी अधिकारी संदीप कोहिनकर यांच्या हस्ते करण्यात आला. यावेळी कोहिनकर यांनी फेटा घालण्याचा प्रयत्न केला मात्र महाजन यांनी नकार दिला. परंतु बाजूला बसलेल्या पालकमंत्री राधाकृष्ण विखे पाटील यांनी स्वतः त्याठिकाणी जाऊन आपल्या हाताने महाजन यांना फेटा घातला.
त्यानंतर राज्याचे आरोग्य मंत्री तानाजी सावंत यांचा सत्कार उपमुख्य कार्यकारी अधिकारी इशादीन शेळकंदे यांच्या हस्ते झाला. त्यावेळीही पालकमंत्री विखे पाटलांनी स्वतः सावंत यांना फेटा घालून त्यांचा सन्मान केला. वारकरी फेटा मध्ये सर्वांनी एकमेकांना पाहून आनंद व्यक्त केला अनेकांनी स्वतःच्या मोबाईल मध्ये या फेट्याचा सेल्फी घेतल्याचे चित्र पाहायला मिळाले.
