डीआरडीओच्या (Defence Research and Development Organisation – DRDO) कोरोनावरील औषधाची (2-Deoxy-D-glucose or 2DG) दहा हजार पाकिटे (गुरुवार, २७ मे २०२१) विक्रीसाठी उपलब्ध होतील. औषधाची ही पाकिटे खुल्या बाजारात विक्रीसाठी पाठवली जातील.
डीआरडीओ आणि डॉ. रेड्डीज लॅब यांच्यात एक करार झाला आहे. या करारानुसार डीआरडीओच्या कोरोनावरील औषधाची पाकिटे डॉ. रेड्डीज लॅबने तयार केली आहेत. औषधांच्या व्यावसायिक वितरणाची जबाबदारीही डॉ. रेड्डीज लॅबने घेतली आहे.औषधाची आणखी पाकिटे लवकरच बाजारात दाखल होतील. ‘एएनआय’ च्या ट्विटरवर ही अधिकृत माहिती देण्यात आली आहे.
डीआरडीओच्या संशोधकांनी विकसित केलेल्या कोरोना प्रतिबंधक औषधाला ड्रग्स कंट्रोलर जनरल ऑफ इंडिया अर्थात डीसीजीआयने आपात्कालीन वापरासाठी मंजुरी दिली आहे. या औषधाचे नाव 2-डीऑक्सी-डी-ग्लूकोज (2-डीजी) असे आहे. डीआरडीओने हैदराबादच्या डॉक्टर रेड्डीज लॅबोरेटरी या कंपनीसोबत संयुक्तपणे काम करुन कोरोना प्रतिबंधक औषध तायर केले आहे.
हॉस्पिटलमध्ये दाखल असलेल्या कोरोना रुग्णांवर 2-डीऑक्सी-डी-ग्लूकोज (2-डीजी) हे औषध प्रभावी ठरत असल्याचे चाचण्यांमध्ये आढळले. यानंतर डीसीजीआयने डीआरडीओच्या कोरोना प्रतिबंधक औषधाला आपात्कालीन वापरासाठी मंजुरी दिली.
2-डीऑक्सी-डी-ग्लूकोज (2-डीजी) हे औषध पावडर (पूड) स्वरुपात उपलब्ध आहे. हे औषध पाण्यास मिसळून ते पाणी पिण्यासाठी दिले जाते. दररोज ठराविक प्रमाणात औषधमिश्रीत पाण्याच्या सेवनाने कोरोना विषाणूच्या फैलावाला आळा घातला जातो आणि रुग्ण लवकर बरा होतो. कोरोना रुग्णाचे व्हेंटिलेटर अथवा ऑक्सिजन सिलेंडरवरील अवलंबित्व कमी होत जाते. यामुळे कोरोना रुग्णांना एक सहाय्यक औषध म्हणून डीआरडीओचे औषध देण्यासाठी डीसीजीआयने मंजुरी दिली आहे.
कोरोनाबाधीत रक्तवाहिन्यांमध्ये साठून औषधातील घटक विषाणूच्या फैलावाला आळा घालतात. तसेच शरीरातील कमकुवत झालेल्या अवयवांना ऊर्जा पुरवून रुग्णाला आजारातून सावरण्यास मदत करतात. डीआरडीओच्या औषधाला अधिकाधिक यश मिळाल्यास कोरोना संकटातून बाहेर देशाला मोठी मदत मिळणार आहे. यामुळेच अनेकांचे लक्ष डीआरडीओच्या औषधाकडे आहे.
