सोलापूरच्या विकासासाठी अजित पवार यांच्या आम्ही पाठीशी ; सोलापूरचे नेतृत्व संतोष पवार यांनी करावे ; बैठकीत ठराव

सोलापूर : राष्ट्रवादी काँग्रेसमध्ये बंडखोरी झाल्यानंतर उपमुख्यमंत्री अजित पवार यांच्या गटाची सोलापूर शहरातील पहिलीच बैठक रविवारी पूर्व विभाग सार्वजनिक वाचनालयात घेण्यात आली. राज्याचे उपमुख्यमंत्री अजित पवार त्यांच्या वाढदिवसानिमित्त विविध कार्यक्रमांचे नियोजन यावेळी करण्यात आले. अजितदादा यांच्यात विकासाची धमक असून सोलापूर शहराचा विकास पाहता आम्ही अजित पवार यांच्या पाठीशी असल्याचा सूर बैठकीमध्ये पुढे आला.

बैठकीच्या अध्यक्षस्थानी प्रदेश सचिव संतोष पवार होते. माजी गटनेते किसन जाधव, माजी नगरसेवक नागेश गायकवाड, युवक शहराध्यक्ष जुबेर बागवान, वसीम बुऱ्हान, श्रीनिवास कोंडी, राम साठे, प्रमोद भोसले, अमीर शेख, हेमंत चौधरी, खलील शेख, मल्लेश बडगु, बसवराज कोळी, राजाभाऊ  बेळेनवरू, रुपेश कुमार भोसले, आनंद मुस्तारे, महेश निकंबे, सिद्धेश्वर आंबट, शशिकला कस्पटे, मोनिका पोवार, लता ढेरे यांच्यासह पदाधिकारी कार्यकर्ते मोठ्या संख्येने उपस्थित होते.

संतोष पवार म्हणाले, राष्ट्रवादी काँग्रेस पक्ष विरोधात असताना सोलापुरात अनेक मोर्चे, आंदोलने, निषेध, निदर्शने इथे जमलेल्याच पदाधिकाऱ्यांनी केले आहेत. युवक, महिला, अल्पसंख्यांक, ओबीसी, मागासवर्गीय, भटक्या विमुक्त यासह सर्वच सेलच्या पदाधिकाऱ्यांनी सोलापुरात राष्ट्रवादी पक्ष जिवंत ठेवला. अनेक गुन्हे अंगावर घेतले त्यामुळे स्वार्थासाठी आपण अजित दादा सोबत गेलो हा आरोप चुकीचा असून स्वार्थ आमच्या रक्तात नाही असे खोडून काढतानाच राज्याचे नूतन उपमुख्यमंत्री अजित पवार, प्रदेशाध्यक्ष सुनील तटकरे, यांच्यासह सर्व नवमंत्र्यांच्या अभिनंदनाचा ठराव संतोष पवार यांनी मांडला. यावेळी सर्व उपस्थित पदाधिकारी कार्यकर्त्यांनी हात वर करून या ठरावाला एकमताने मंजुरी दिली.

जुबेर बागवान म्हणाले, पक्षाचे विधानसभा अध्यक्ष, पक्षाचा युवक अध्यक्ष, पक्षाच्या महिला पदाधिकारी, पक्षाचे प्रदेश पदाधिकारी, प्रांतिक नेते, अल्पसंख्यांक पदाधिकारी, ओबीसी पदाधिकारी येथेच आहेत मग संघटना कुठे आहे? पक्ष कुठे आहे? तर या स्टेजवर राष्ट्रवादी काँग्रेस पक्षाची सर्व पक्ष, संघटना आहे. सर्वांना माहित आहे 2017 ते 2022 सालापर्यंत राष्ट्रवादी काँग्रेस पक्ष, संघटना उभी कोणी केली? मजबूत कोणी केली? तर ते एकमेव नाव म्हणजे संतोष पवार. सोलापूर शहराचे नेतृत्व करणारा तरुण तडफदार म्हणून संतोष पवार हे एकमेव कार्यकर्ते आहेत आणि सोलापूर शहर अध्यक्षपदी संतोष पवार यांची निवड व्हावी असा ठराव जुबेर बागवान यांनी मांडला.

सोलापूर शहराच्या विकासाचे अनेक प्रश्न आहेत आणि ते प्रश्न निधी शिवाय सुटू शकत नाहीत त्यासाठी अजित पवार यांची सोलापूर शहराच्या विकासासाठी निश्चितच मदत होणार आहे. म्हणूनच सोलापूरचा विकास डोळ्यासमोर ठेवून आम्ही अजित पवार यांच्या सोबत आहोत, ना की स्वार्थ पाहून असेही बागवान यांनी सांगितले.